地產股等埋預算案爆上
2018年02月27日
明日係《財政預算案》宣佈日子，公眾焦點係財政司司長陳茂波會唔會直接派錢。記得2012年的《預算案》，當時的財政司司長曾俊華唔想直接派錢，於是諗住將六千元入落打工仔強積金戶口，點知惹來痛罵，最後急急扭軚派錢先甩到身，經此一役，大家就話茂波呢
次如果唔直接派錢，就真係太過忠直啦。
偷步炒《預算案》食齋唔加辣
從O依家聲氣睇，茂波似乎都仲係堅持唔直接派錢，認為一刀切灑銀紙，結果係連首富都有錢收唔係咁妥，寧願用啲錢派多幾粒糖。中環茶友都係生活無憂之人，所以佢地焦點唔在派錢，而係樓市政策。有茶友坦言，今年樓市熱辣辣，傳統小陽春喺農曆年前提早出現左，地產股無跟住上升，主要係驚《預算案》出招，若然預算案無辣招，唔排除地產股又會爆一爆，如果係咁，又點使靠政府派嗰一萬幾千先？
茶友話，去年樓市升15%，升勢去到年尾未停。春節前個市仲有唔少「好消息」，包括政府賣獅子山隧道出口地皮創新高價，跟住海航賣啟德地，恒基李四叔高價買入，呢啲消息都刺激買家入市。喺呢啲消息推動下，發展商一手樓雖然無乜大動作，但二手樓就有異動，幾個樓市指標喺農曆年後搶先飆上新高。發展商新盤未動，有機會係唔想喺《預算案》前推盤，因為市場氣氛觀望可能影響去貨；若然賣得好又擔心觸發政府加辣，咁不如等埋財爺份報告先出招。
對於《預算案》加辣機會，中環茶友話從一、二手樓市況，以至海外地區好似加拿大都再出辣招，按常理財爺都應該有啲嘢去冷卻吓樓市，關鍵係O依家辣招出左咁多，要有好招唔易，更重要係現屆政府思維以置業主導，即係叫人買樓，而唔係控制需求，所以連前立法會主席曾鈺成都叫政府畀二十萬幫首置上車，喺呢個大氣候下，財爺似乎好難出招打壓樓市。若然真係咁，樓市呢排升左一浸，地產股普遍都仲係比高位低左一成左右，雖然唔算跑輸大市，但唔排除佢會炒炒《預算案》食齋唔加辣。
睇番地產股昨日都有小小偷步炒味道，龍頭新地(016) 收升2.6元，報130.6元；恒地(012) 收升0.8元，報51.4元；長實(1113) 升0.75元，報68.3元。恒指就收報31469點，上揚231點，國企指數收報12834點，上漲99點，成交1237億元。騰訊(700) 逆市跌0.09%，報453元，否則指數升勢會仲多，近排強勢的港交所(388) 就升3.5%，收造295.8元；吉利汽車(175) 急升6.5%，收報25.45元。美國爆發流感，京都念慈菴川貝枇杷膏在美國爆紅，據《華爾街日報》早前報道，喺Google搜尋枇杷膏程度大增，當中以加州最明顯。在內地代理金活醫藥集團(1110) 股價走高，一度報1.8元，飆近60%，收報1.45元，升25%。
兩會前A股六連升
金活主要在中國從事品牌進口醫藥及保健產品分銷。近一年股價表現麻麻，由2元水平插到近1元。
值得留意係港股向好，唔多唔少受內地A股再漲有關。內地即將舉行兩會，最熱話題係會修改憲法，取消國家主席限做兩任規定，外界解讀係現任主席習近平會喺呢屆期滿後續任。按照內地思維，喺舉行兩會通過呢個修訂前，內地股市應該都會維穩，保持大漲小回格局，A股昨日六連升，就變成順理成章，上證指數收報3329點，升40點；深證成指收報10895點，升232點，本港掛牌的A股ETF都造好。斥資373億元人民幣興建的順豐機場會落地湖北鄂州，順豐控股(002352)直線漲停；長城汽車(601633)聯同寶馬探索新模式，早盤股價直迫漲停，亦令到香港掛牌的汽車股有炒作。
陸羽仁
金融High Tea 舊文
來源 source: http://hdfin.stheadline.com
