財路：中國星炒兩轉盈喜
■中國星上年10月以20億元出售澳門蘭桂坊酒店及18個澳門住宅單位，呢筆巨額溢利應在今年上半年入賬。互聯網圖片
中國星（326）因金融資產增值發2017年盈喜，仲未提及出售酒店入賬，即係話炒中國星盈喜，可以炒兩轉，兼炒資產大升值。
中國星上年10月話以20億元出售
澳門酒店，估計獲溢利6.5億元，呢壇製作，今年1月搞掂。而喺中國星上星期發2017年度盈喜當中，就冇提及酒店出售獲利入賬，換言之，喺新一個2018年財政年度，呢筆巨額溢利先入賬反映。
中國星本月26號派2017年成績單，已經有另一瓣金融資產升值，有盈喜可炒，嚟緊2018年上半年，又有得炒酒店獲利入賬嘅盈喜factor。
計計數，中國星出售酒店溢利6.5億元，折約每股獲利約0.72元，中國星現價0.57元，潛喺近八年大底，對應PE得0.79倍！
話中國星出售酒店獲利係一次性，兼因此出現超低PE，但咁睇，集團因呢壇製作，資產值會由原先嘅30.8億元，提升到45億元，NAV增值係實實淨，去到5蚊，PB得番0.11倍！
又中國星到上年6月尾，揸現金6億元，銀貸7.3億元，有淨借款1.3億元，亦因為出售變現回籠，會變成揸淨現金18.7億元，或每股2.06元，係中國星現價近3.8倍！
中國星現金牛，有大把銀彈喺手，買一股中國星，已經等於揸住兩蚊淨現金，而集團位於澳門總樓面45萬平方呎土儲（已規劃當中30.6萬平方呎，作住宅用途）係免本持有。
數咁計，當中國星翻一番到1蚊樓上，PB都係得0.22倍，仲未上到集團過去五年平均PB0.3倍，亦未有耐去到每股淨現金兩蚊水位！
錢雋
細價股專家
本欄逢周二刊出
錢雋
財路 - 錢雋 舊文
來源 source: http://hk.finance.appledaily.com
