平保業績拉動中港股市
2018年03月20日
長和集團(001) 主席李嘉誠退休，大家計一計數，長江在1972年上市，如果由佢上市投資一萬銀買長江，將咁多年收到嘅股息全部掟番落去，O依家就變咗五千萬元，呢個就係買強勢大股的犀利之處。有人買股鍾意買大件夾抵食的穩陣大股，計淨值同派息，
呢類股份風險低，但若論升值，就始終要買增長股。
揀中型增長股(小型更大風險)要有大環境，加上好嘅管理層，特別係領導人，仲要對股東好，呢啲條件唔容易。長江初時都係一隻增長股，過去香港喺發展中市場，長江睇準環境變化，邊樣有得做就做邊瓣，食盡不同行業升浪。未來呢類增長股相信較難喺香港搵到，要搵適宜搵內地股或有機會在內地做生意的股份。呢期內地幾隻大股宣佈業績，最受矚目的是騰訊(700) 喺星期三公佈業績。
好似呢幾日隻平保(2318) 炒上，市場憧憬佢業績好，可以帶動增長。平保今日公佈業績，券商預測純利介乎733.74至826.26億元人民幣，較2016年同期623.94億元人民幣，按年升17.6%至32.4%；中位數754.18億元人民幣，按年升20.9%。
港交所借利淡消息回調
睇番平保今年表現，股價最高撲上98.85元，逼近紅底股水平，但之後大市急挫，佢升得急就插得快，一度回落至近80元，回調幅度接近兩成。隨著業績期迫近，佢股價再度回勇，收復不少失地，再度有跑贏大市跡象。不過，佢升勢升得急，需要提防業績就算靚仔，可能都會有好消息出貨。長遠而言，內地壽險市場仍然被視為潛力未完全發揮市場，平保被視為做得最好的公司，加上管理層強調應用科技，不斷開拓唔同業務，係以中國市場為主的大股中，算係最具增長概念的大公司。
昨日回得急的一隻股份係港交所(388) ，佢沽壓大相信係借兩個消息，一個係上周傳出沙地阿美可能唔喺國外上市，由於市場曾傳呢隻巨無霸有機會嚟香港掛牌，擱置海外上市傳言唔多唔少淋咗一桶冷水。
另一個消息係內地近日大力推動CDR(中國預託證劵)，向在美國掛牌科技公司招手，百度已經話有興趣以CDR回A。市場認為若然CDR大收旺場，會同港交所構成競爭。
對於沙地阿美來港上市，港交所的確好努力爭取，甚至港府財金官員都出手相助。對於爭取呢個巨無霸上市，陸羽仁同中環金融巨頭傾起最新狀況，佢話沙地阿美咁樣放消息，皆因紐約、倫敦、香港都俾唔到佢想要的條件。紐約、倫敦喺監管上都有疑慮，香港條件本來唔錯，但沙地阿美希望中國政府可以畀着數佢，而且佢唔單止想中國做基礎投資者，而且希望中國可以開放下游市場，畀佢係內地做煉油業務。
借毛記個勢沽世華食胡
明報母公司世界華文媒體(685) 股價暴升，早上11時半升了233%。上星期五收0.72元，昨早最高見3.69元，之後回順，收市報1.92元。整間公司市值由上周五收市時的12.1億，一度暴漲到40.5億。
世界華文媒體近年純利下跌，股價低迷，本來就無甚可炒，如今突然暴升，市場傳聞和其屬下公司持有100毛母公司毛記葵涌一成股權有關。
毛記葵涌﹙1716﹚正在招股，超額認購逾千倍，世界華文媒體透過屬下萬華媒體﹙426﹚持有毛記葵涌一成股權，萬華媒體亦上升。市場大炒世華，唔排除係有人借意造勢，但萬華揸住的毛記唔係咁易沽，有呢兩隻冷門股的股民，睇嚟都係趁高食胡着數啲。
陸羽仁
金融High Tea 舊文
來源 source: http://hdfin.stheadline.com
