Can Bank：長和真的順利過渡了？
■李澤鉅跟老豆李嘉誠在公司工作超過30年。資料圖片
長和（001）主席李嘉誠一如預期宣佈，今年五月周年股東大會後正式退休，由長子李澤鉅接任，表面上所有都安排好，市場有足夠時間消化消息（退休消息去年已傳出），李澤鉅跟老豆李嘉誠在公司工作都
超過30年，分身家亦已經在幾年前公佈，但長和系股價今日仍要逆市跌，點解？
李澤鉅接班能力，佢老豆揀得佢，相信亦都信佢唔會敗咗副身家。不過，長和目前董事會七個執行董事，除咗李澤鉅，個個都超過60歲，其中最年長甘慶林已經超過70歲。
在李嘉誠退休之後，相信現時管理層將會在未來一段時間逐步退休，睇返未入董事會嘅高管，根據公司2016年年報顯示（2017年年報未出），只有副財務總監張鈞海是50出頭，其他全部均超過60歲。近年亦未見有突出新高管出現，未來如何過渡，相信會係一個問題。
更重要嘅係頭馬霍建寧今年已經66歲，而霍更早在李澤鉅加入長和幫手之前已經在和黃工作，呢位年薪過億嘅老臣子，至今角色同地位仍舉足輕重，呢個位置嘅接班人尤其重要。
今次李澤鉅上任之後，要幾多年之後，先可能等到兒子李長禧出身接手，李長禧2006年出生，今年才12歲，到23歲大學畢業，李澤鉅已經65歲，以李澤鉅跟李嘉誠學藝年期31年計，李澤鉅要到96歲先可以培訓到一個同自己一樣經驗嘅人主理公司。就當第三代人選到時將會Ready，長和又係咪可以搵到一個一模一樣嘅新霍建寧幫手？
散子
散子
Can Bank - 散子 舊文
來源 source: http://hk.finance.appledaily.com
