金手指：行長劉鶴變易綱
■易綱將會成新一任人民銀行行長。資料圖片
1979年，美國總統卡達搵番來嘅聯儲局局長Miller，只係做咗十八個月，就升職做財長。你可能話：「嘩！咁快升職，一定係交出咗啲亮麗嘅成績出來！」
如果你咁直線推斷，就錯曬。當年，花旗國通脹已完全失控，之前大幅飆升後，
物價都仲年年雙位數字咁加。咁點解有咁嘅成績，都仲升佢職？冇錯，睇體制圖，聯儲局局長確實係財長嘅下屬。不過當美國財長連編預算案能力都冇，歸國會時，我問你，聯儲局局長powerful啲？定係財長？由聯儲局局長變財長，係咪真係升職？
回到今日，之前傳得火熱嘅新人民銀行行長劉鶴，大熱倒灶。新行長將會係現副首嘅易綱。劉鶴就被傳會管嗰個新嘅監控機構，一炮管曬所有同錢有關嘅團體。其實，孫柏文相信易綱同現行長周小川一樣，都係奧國學派信徒。即錢不能濫發，因啲人會瘋狂借錢，令過度投資，當啲新項目連息都還唔到，遲早爆煲。而爆嘅一刻，就係周小川之前講過嘅Minsky Moment。
不過，究竟新局會點？其實咁多舉動，都係中央希望對貨幣供應嘅控制增加。之前就算收緊，例如勒住銀行放貸，啲保險公司就推「投資產品」，令貨幣供應繼續增加。呢刻，好難解讀下一步係點。就睇嚇習王（習近平加王歧山，唔好諗多咗！呵呵）下一步點搞。
孫柏文
獨立股評人
http://fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.finance.appledaily.com
