中環在線：呂志和未言休︰同誠哥冇得比
所謂一石激起千重浪，今年90歲嘅長和系主席李嘉誠，上星期五宣佈退休，上市王國正式交畀長子李澤鉅，跟住落嚟，大家當然八卦一下，其他本地家族企業有番咁上下年紀
嘅掌舵人，又有冇考慮仿效誠哥高調退休。
嘉華（173）噚日舉行業績會，89歲主席呂志和精神奕奕現身，佢大讚李嘉誠係卓越嘅成功者，智慧高，而且得到各方認同，又欣賞佢退休後仍然為教育、創科等方面造福下一代，「為後生做番啲嘢，值得讚賞」。
「好過日日等日出日落」
呂志和則未言休，佢笑住話：「講咗好多次，唔想再講，趁健康，會用自己經驗幫番啲同事同後生，好過日日等日出日落。」唔係講笑，佢呢句等日出日落嘅比喻，的確講過好多次。
咁誠哥退休後應該較為清閒，佢又會唔會約對方出嚟飲杯茶食個包呢？呂志和忽然好謙咁話︰「我哋呢啲咁樣同佢比，係冇得比，見嚇面Hello就有，咁飲茶都有，你唔好問我咁多喇。」
華華就覺得，天下間嘅老人家都一樣，退唔退休唔重要，最緊要身體健康，做自己喜歡做嘅事，有家人陪伴，咁就最幸福嘞。
正如李嘉誠辦公室掛住一對對聯，內容係清朝明臣左宗棠所寫嘅「發上等願，結中等緣，享下等福；擇高處立，就平處坐，向寬處行」，享普通人嘅福就好。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
