Money Walker：科技股蜜月期恐至尾聲
■歐美各國對科技業已經開始加強監管，facebook事件令要求監管之聲進一步發酵。資料圖片
納指收復2月份大跌市失地冇耐，美國科技股又爆小股災。除咗facebook爆出洩露用戶訊息事件，同埋儲局議息引發市場擔心官員放鷹
之外，今次美國科技股下跌同行業基本因素惡化亦有關。
首先，歐美各國對科技業本身已經開始加強監管，facebook事件只會令要求監管之聲進一步發酵。越來越多法規施加喺科技企業身上，肯定會導致營運成本上升，以及業務發展受到更多限制，窒礙科技股盈利與增長。
其次，多國同意針對跨國科技巨企開徵數碼稅，以應對科企將收入轉移至低稅率國家呢招避稅手段。雖然數碼稅一事預計最快兩年後先達致共識，但股價已反映定數年後嘅預測盈利。
第三，環球貿易戰如果不幸開打，唔止同進出口相關嘅行業受累，跨國科企亦肯定難以置身事外。科網股表面上唔會直接受重關稅影響，因為冇實物產品進關出關，不過一旦貿易戰正式展開，各國政府為報復本國出口被加徵關稅，有可能透過唔同手法刁難他國企業，包括以各種藉口阻止科企跨國併購，又或以壟斷為由打擊外資科企喺本國發展。
科技股依然係全球少數具結構性增長嘅行業，隨住科技進一步滲透至日常生活與企業營運，手握領導技術同研發能力嘅大型科網企業，依然有無限空間搵更多錢，唔會因為上述原因就進入行業低潮。不過與此同時，呢類股份於監管同稅收上為時多年嘅蜜月期亦好大機會已屆尾聲。
對於科技股往後仲能否長期跑贏其他板塊，筆者不感樂觀。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.finance.appledaily.com
