喪炒毛記火棒
2018年03月21日
呢兩日市場話題唔係中美貿易戰，亦唔係fb被人揭發喺通俄門漏料，而係毛記葵涌招股引起的喪炒效應。毛記葵涌招股雖然未正式截止，但已經被捧成超購王，市場傳聞講法係超購二、三千倍，仲有數以百計認購到盡的「頂頭槌飛」。
毛記熱到如此，就有少少超乎理性啦
，因為根據佢披露資料，集團2016年度盈利係3272萬，2017年頭八個月盈利按年大跌84%，去到516萬。以每股發售股份指示性發售價範圍1元至1.2元計，有近三成集資所得要用作開支後，實得款項淨額約5280萬元，將用作加強現有業務，無乜講有好大動作。公司掛牌後資產淨值約為0.3元。從公司盈利趨勢、資產淨值同發展大計，都睇唔到有太大吸引力，變成超購王，似乎唔係睇緊基本因素。
有世華股票就沽之
不過，股市唔係單講理性地方，數字講唔通，概念都講唔通都唔緊要，仲有一招可以用，就係人性嘅貪婪。好明顯，O依家毛記被人包裝成為超購王，擺明就係話俾大家聽唔使理乜嘢基本因素，總之認購有着數。點樣證明呢樣嘢呢？一個方法就係睇吓間接揸住佢股份的世界華文媒體(685) 股價，呢個星期佢由0.7元爆上，周一最高去過3.6元，收市回落到1.92元，昨日早上又炒上3.26元，收2.69元，昨日升40.1%，大戶似乎係唔信炒到你信。
睇番世華過去盈利反覆回落，本來無人吼，但借於毛記上市呢個消息，市值炒高左30多億元市值，去到45億市值。妙就妙在世華並無直接持有毛記，而係透過佢持有73%的萬華媒體(462) 持有未上市10%股權，加埋毛記上市攤薄效應，即係佔毛記上市後權益約為5.5%左右。以毛記招股價市值只有三億元計，除非佢掛牌狂升200倍，去到600億元，世華市值先可以增加30幾億元，所以世華的升幅投射出嚟的股價，等如毛記升到去每股200元，而且呢啲股份可否即時出售，出售左又可唔可以俾世華股東分水，都無人答得到，所以世華炒成咁，合唔合理都唔使點講啦。仲有更無厘頭的是，直接揸毛記股份的萬華媒體無乜升，如今仲係六億市億，反而隔一重的世華就喪升，不知邏輯何在。如果手頭有世華股票，從基本價值睇真係出貨的千載良機，你話係咪應該喺櫳底都挖佢出來賣呢？
做左鬼就會迷人
由追捧毛記做超購王到喪炒世華，大戶好明顯係搵佢做火棒工廠，反正呢間公司有知名度，吸引到好多唔識財經的支持者，搞上市玩財技就最合適，呢啲叫「做左鬼就識迷人」，公司上得市自然有大戶會安排點做嘢。牌面嚟睇，唔排除有大戶喺低位儲左啲世華，先來喪炒佢造起毛記個勢，順便走一轉引老散入疊，然後再將毛記炒起。呢啲招數其實過往用過好多次，依然有唔少老散中招，皆因大家心中都有貪念，認為自己短炒一轉，食到多少就走，想鱷口偷金，反而最後變左點心。
facebook懷疑不當洩漏用戶資料，股價重挫近7%，加上市傳特朗普或於周五前宣佈對華進口貨物徵收關稅，杜指周一大插335點。港股一早低開，好彩先跌後回穩，藍籌業績繼續主導大市，恒指收報31549點，升36點，國指收報12597點，跌63點。
煤氣績佳股價創新高
騰訊(700) 放榜前夕有炒作，舜宇光學去年純利按年增加近1.3倍，刺激股價升8.6%收報159.8元，為表現最好藍籌股；煤氣(003) 純利82.25億元，按年升12.1%，派末期息23仙(合計全年派35仙)，十送一紅股。煤氣以全日高位16.18元收市，再創上市新高，升幅0.37%，支持大市收復失地。
陸羽仁
金融High Tea 舊文
來源 source: http://hdfin.stheadline.com
