中環在線：
羅老太廿蚊一粒字徵「孝」文
鷹君羅家爭產風波沒完沒了，最心痛莫過於已經98歲嘅羅杜莉君（羅老太），要同親人對簿公堂外，早前仲爆出原來跟咗佢十幾年嘅菲傭，竟然偷錄對話，變成匯豐嗰邊嘅證人；之後又指佢聆訊時曾不斷
咳嗽，真係夠曬操勞。
任籌委會榮譽主任
唔講唔知，香港新聞工作者聯會最近就搞咗個「愛、傳、城」徵文比賽，打開個網頁一睇，就發現贊助機構係新福港，即係羅家第六子羅啟瑞經營嘅建築公司。題目就一個字「孝」。佢仲將個「孝」字解釋得好詳盡，「孝道是中國社會的基本道德規範，指社會要求子女對父母應盡的義務，包括敬養父母、尊敬、關愛、贍養老人，為父母長輩養老送終等等」。至於籌組委員會榮譽主任就係羅老太，唔通呢幾個月有感而發，所以定呢個題目出嚟？
羅啟瑞上星期先至同媽咪一齊出席聆訊，身體力行支持媽咪，早排更加指「如果所有子女一齊聽曬媽媽講嘢，邊會有事情發生」。今次徵文比賽即日起至4月15日就截止；小學、中學組分別寫500同1,000字，冠軍就可以拎到2萬蚊，而公開組冠軍寫1,500字先可獲得3萬蚊獎金，但除番開都有廿蚊一粒字，可能寫得夠入肉，到時會得到羅老太親自嘉許㖭！
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
