【大茶飯】數據切忌睇表面（青冰）
早兩星期青冰在報章專欄提到金蝶(0268)，話佢龐大的沽空應該係源自可換股債券的持有人，今天再作跟進，有興趣的戰友可在青冰的fb重溫舊文。
在3月底，金蝶的累積沽空股數達3.6億股，佔當時總股本的12%，以當時的股價7.90元計，等值28.7億元，的確嚇
人，但自金蝶宣佈贖回這批CB，促使了持有人大量兌換股份，在4月10日時，已兌咗1.35億股，好喇睇番證監會公佈的數據，在4月13日，累積沽空是2.4億股，減咗1.2億股，似乎初步印證青冰的推論，沽空只係CB持有人鎖定利潤的技倆，佢地兌股後就迅即還貨俾人，將沽空平倉，再睇多個星期，4月20日的累積沽空已減至2億股，而個股價都開始頂唔順，跌到7蚊邊了，當初借貨俾人沽空的機構投資者，收貨後自己都想獲利啊，所以加速跌勢。
現時股票市場資訊爆炸，有好多數據可以輕易獲得，但如果看得太單一，唔去深入拆解，好容易中伏，沽空數字便是一例。以金蝶為例，大量的沽空在今年1月中開始，如果你睇咗幾日近億的沽空額，貿然認為此股後市看淡，咁就慘了，當時的股價只在5.50元附近，3月公佈業績後升到8蚊，肯定被挾死。如果你在3月底看到股價破曬位，又有傳媒報導佢有龐大的沽空數字，今次一定係挾空倉的好時機，似乎係恆大(3333)翻版喎，金碟升多五成都唔過份啫，原來睇漏了CB被贖回的消息，兩星期內，累積沽空數字大幅減少，股價也變回弱勢。
中小型股份出現巨量沽空，有時關連事件未必發生在場內，拆解到金碟，只因有跡可尋，但亦未必可以套用在所有股，只能憑經驗及知識，盡量找原因，記住，睇數據切忌睇表面，要從多方面思考，先可以避免中伏啊。
Fb個人專頁 http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com
