美股跌唔係壞事
2018年06月21日
中美兩國打貿易戰愈打愈肉緊，連華爾街都開始信信哋，美股杜指隔晚一度大跌超過400點，收市跌280點，但港股昨日喺低位有支持企番穩，早段內地跌港股都唔想跌，之後內地股市企番穩，港股就反彈228點，應驗咗我話唔反枱就反彈。
美國總統特朗普做咗股
市波動之源，但美股就有免疫力，一直都喺高位唔肯跌。上周美國傳出會再對華出招，但華爾街無乜反應，到呢個星期亞洲股市急插，美股先至跟跌。科技股之前升勢強勁，O依家回調亦跌得較少。
瑞信估內地八月底降準
美股受累下跌，理論上對全球投資氣氛不利，但中環茶友認為，在呢個環境下可能唔係壞事，因為特朗普可以不斷唔按牌理出牌，在於美國經濟表現強勁，股市高企。喺咁嘅環境無論佢點打，選民同企業都唔覺得入肉，冇乜反應，甚至有好多保守選民覺得佢好英㖭，咁樣試問特朗普又點會捨得收手。所以美股強，特朗普更加唔會收斂，如果美股下跌，大公司高管就會擔心無辦法向股東交代，共和黨自然會收到訊息，貿易戰降溫機會仲會大啲。不過從眼前美國經濟勢頭睇，暫時仲未見到經濟受貿易戰好大威脅，所以貿易戰可能繼續拉鋸，大家打住口水戰先。
中美互「凶」，但市場仍有樂觀派，大行瑞信認為，下半年環球增長前景依然樂觀，即使各國央行開始收緊貨幣政策，消費開支和商業投資將維持穩健。隨著財政刺激措施和勞動市場進一步增強，美國經濟有望強勁增長。下半年環球股市仍有上升潛力，經濟增長強勁料帶動收益，繼續看好股票多於債券，特別是能源、科技和金融板塊股份。
講到內地，瑞信認為去槓桿仍然係中國市場主要不確定性，或會令經濟增長放緩，以及增加部份行業流動性壓力，但當局正積極推行改革，預計中國全年經濟增長6.5%，佢估計人行8月底將降準50點子。
外資大行估計中央遲啲會降準，呢個似乎係市場共識。短期而言，阿爺見到周二股市大插都忍唔住要出手。內地官媒呢兩日喺上證綜指跌穿3000點後空群出動，力撐A股無大跌空間。人民銀行行長易綱仲大派定心丸，股市表現只是受情緒影響。阿爺大力出口術，上證指數昨日先跌後升，收報2915點，回升7點；深成指數收報9501點，漲86點。
恒指初段唔跟內地股市跌，中段內地股市止跌回升時，恒指一度反彈超過476點，之後升幅收窄，收報29696點，升228點；國指升26點，收報11519點。成交金額1098億元。周二狂插的中興通訊(763) 發公告澄清稱，美國參議院通過對DNAA版本非美國法律。受此消息影響，一周跌幅逾五成的中興終於反彈，股價高見11.86元，收市暴漲20%報11.82元，創2017年11月以來最大漲幅，涉資9.6億元。
大股東為中航科工打氣
最後講講隻中航科工(2357) ，據內地《證券日報》報道，周二中國航工內資股轉換H股正式於港交所上市。中航科工相關人士說法是，中航科工作為央企H股全流通第一間試點企業，對航空工業和中航科工均會產生積極影響。
有業內人士分析，全流通後航空工業真正取得所持中航科工股份的流通權。從股權價值來看，有了較大提升，注資及開展資本運作意願進一步提升。該報仲引述，中航科工控股股東航空工業方面消息，為改組打氣。消息指全流通後，中航科工在航空工業改革發展中具有重要戰略位置，大股東不但不會減持中航科工股份，還會以中航科工為航空高科技產業發展平台更加積極做強、做優、做大航空產業。中航科工昨先跌後升，收4.55元，升0.7%。據中航科工(2357) 公佈，控股股東中國航空工業集團(航空工業)於6月20日購入327萬股公司H股，每股平均價約4.6元。
陸羽仁
金融High Tea 舊文
來源 source: http://hdfin.stheadline.com
