中環在線：馬雲餓了麼？30億人仔搞外賣
■阿里巴巴旗下的「餓了麼」發動市場爭奪戰。資料圖片
內地手機支付大行其道，所以內地人成日話香港人落後，其實唔止手機支付，內地人使用電子外賣平台都十分誇張，現正上演一場市場爭奪戰㖭。就係由阿里巴巴創辦人馬雲旗下「餓了麼」，對撼騰訊（700）老闆
馬化騰有份嘅「美團點評」。餓了麼執行長王磊仲話，今季要豪擲30億人仔爭客、爭市場㖭呀。
誓爭逾半市佔率
阿里巴巴關聯公司螞蟻金服今年初收購咗外賣平台餓了麼，餓了麼執行長王磊近日接受外電訪問，講明要喺中短期內，喺內地外賣市場爭奪一半以上市佔率。為打呢場仗，佢哋本月開始，向消費者、商戶、快遞合作夥伴提供補貼，計劃今季投入30億人仔。
爭呢個外賣市場為乜東東？除咗為錢，咪係為數據囉，今日係大數據時代，乜都講數據，數據最值錢，餓了麼每日至少有40萬名送貨員出動，阿里可以用到呢堆物流數據。王磊都話，餐飲與外賣係用戶經常使用嘅服務，有利佢哋嘅支付業務，餓了麼對阿里嘅新零售戰略十分重要咁話。
餓了麼對手美團亦都已經遞咗上市申請，打算集資儲彈藥應戰，睇番美團嘅初步招股書，佢哋2017全年交易用戶有3.1億，涉及交易金額3,570億人仔，都咪話唔驚人！
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
