智取大市：美滙爆升的衝擊
■美滙強勢下，港滙好可能星期一就觸及7.85，金管局入市令拆息有機會回升。資料圖片
星期五美國公佈7月核心CPI係近10年最大按年升幅2.4%，高過預期嘅2.3%，市場篤定美國9月加多一次息。喺加息更加無懸念之下，美滙指數急升破頂，新興市場貨幣下跌。股市都可
能形成一下短暫衝擊。
美滙強勢下，港滙好可能星期一就觸及7.85，金管局入市令拆息有機會回升。大型銀行9月底順水推舟加P機會偏高。
未來個幾月，港股會進入「香港必然加P」嘅陰霾，但整體港股走勢更加視乎美滙隨時直奔100關口之下，人民幣係咪如人行官員放風地必然保7。人行保7，應該更最合理劇本，人民幣滙價即使被輕微高估，對於中國經濟、同埋內向型資產市場未必構成大問題，取其輕必然係穩定滙價。
人民幣保7同時港滙跌到弱方兌換保證，等於人民幣、港元、美元之間滙率鎖死一段短時間。至於呢個情況，對於出口型、尤其客戶分佈越分散嘅股份最為不利，例如玖紙（2689）之類，如果外向型股份嘅本身利潤率越窄，面對情況越大劑。騰訊（700）呢類收入模式完全內向型嘅股份，就礙於人民幣兌換成港元、美元貶值，7月跌市之下，股價某程度上大部份反映有關情況，人幣因素稍後可能會趨向中性。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com
