收市閒情 - 千頌C 2018年11月21日
收市閒情：香港，註定為國捐軀 - 千頌C
美國話「重新審視香港獨立關稅區地位」，林鄭即刻衝出去護駕。香港，註定要為國捐軀！ 資料圖片 適中字型 較大字型
中美冷戰，美國輕輕一句「重新審視香港獨立關稅區地位」，有如一個炸彈掟過嚟，將香港變成人質，「你夠膽你咪鬱！我㩒掣！」點知，「好打得」嘅林鄭，對住侵侵都一貫好打得嘅作風，又話人哋戴有色眼鏡，又話雙重標準，反正就係一副，秦沛式「你大我啊」嘅姿態。林鄭信心滿滿，當然係因為佢好清楚，美國太多錢喺香港，走不了。不過，局勢無論點發展，香港，註定要為國捐軀！
情境一：美國㩒掣，取消《香港關係法》
呢個情況當然極端，一旦出現，香港就同一個中國普通省市無異，簡單一句，即係香港玩完。至於習近平一直以來嘅鴻圖大計大灣區，本來就係Sell「兩種制度、三個獨立關稅區」如此一來，大灣區最大賣點之一，即時埋落港珠澳大橋底。香港成功為國犧牲，都係一種成就。
情境二：美國真得靠嚇，講完就算
如果呢個情況出現，你會覺得鬆一口氣，咁就真係開心得太早了。話說商界對林鄭回應美國報告太強硬，已經令商界好唔Gur。不過，假如美國提出呢個Issue後，但原來咩都唔敢做，變相打草驚蛇。往下來中國對香港嘅控制，就只會得寸進尺，一國兩制？Byebye啦。另一方面，當一國兩制接近空話，外資多少都會走一部份。香港，都係死。
情境三：中國跪低
𠵱家個問題係，人哋講中曬，冇屈你。回歸咁多年，份報告連最update嘅馬凱事件都寫埋落去，仲要加埋中國外交部客方講明「中英聯合聲明是歷史文件，不具任何現實意義及約束力」。如果係咁，香港雖然保住獨立關稅區地位，但就成為長期嘅人質。不過中國都唔係省油的燈，唔會甘心長期被威脅，香港之後又會有另一番波瀾。
情境四：大和解
咁樣就相安無事，大家繼續搵錢，香港就繼續慢慢成為一個中國其中一個市。仲叫香港人？叫大灣區人啦。
話說，當年韓戰爆發，港英殖民地政府加入對中國大陸實施禁運的行列，變相造就香港商人崛起。今次又係冷戰，但林鄭就衝出去護駕，要為國犧牲，對抗西方八國聯軍，真係想問，做咩啫你？
千頌C
http://fb.com/winbigwok
本欄逢周三刊出
收市閒情 - 千頌C 舊文
來源 source: http://hk.finance.appledaily.com
