金手指 - 孫柏文 2018年12月4日
金手指：暫緩的無間地獄 - 孫柏文
美國今年四月宣佈年中會落實制裁俄鋁後，落實日一拖再拖。今次中美談判，相信會以同一模式進行。 資料圖片 適中字型 較大字型
股票市場，成日都被批評好短視。今時今日，世界有如只係去到1月1號後嘅90日。大家都知喺周末G20會議，美帝宣佈推遲90日，早前已收10%關稅嘅產品，提升至25%嘅落實日。
之後點？冇人敢估。孫柏文只見啲行家列出究竟美帝同我國偉大中央，喺嗰90日裏要拆掂啲乜，而冇人敢估得唔得。我可以同大家講。一定拆唔掂。
美帝一路要求嘅嘢，唔係淨係咩三零、二停、一允許咁簡單。而係嗰六樣要求背後，係我國多年運作核心價值觀，孕育出來嘅政策。
如果中央真係喺嗰六樣嘢屈服，講緊嘅係要全面推翻自己嘅價值觀。由花旗國航空公司網站唔需要再「中國台北」，到陀地新西票王有得參選。90日做到？唔好玩啦。
咁你話可唔可以齋做嗰六樣嘢呢？我唔直接答你，我用例子答你。
大家作為fan屎，都知本欄係俄鋁（486）股東互慰會。今年四月宣佈話年中會落實制裁俄鋁後，落實日一拖再拖。美帝一路都話唔係唔妥俄鋁，只係唔妥佢大股東，只要佢減持就放生俄鋁。
咁大股東咪走去問，減持幾多先夠？美帝唔答。大股東又問，我減持XX%，夠唔夠？美帝又唔答。一次又一次畀proposal，美帝次次睇完，都話畀佢再研究嚇。股價一路低殘。股東就一路活在三倍PE嘅無間地獄。
我相信，中美談判，就會以同一模式進行。所以，作為俄鋁互慰會會長，我今日想歡迎所有股民，welcome to無間地獄。
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://hk.finance.appledaily.com
