大棋局 - Mr. Tregunter 2018年12月4日
大棋局：明爭緩和 暗鬥加劇 - Mr. Tregunter
今次G20峯會有偈傾，因為中國讓步。但下一次就唔易讓，再下一次甚至無得讓，美國只能用更強硬嘅方法打。 資料圖片 適中字型 較大字型
中美之爭發展至今，從三個層次看待。按美國財政狀況可以計到，加息理論上限6厘，實際會加4厘左右，這是高度；加息、縮表同時進行，原本預期2020完結，這是長度。一旦加息周期完結，即經濟見頂開始下行。美國要同中國打落去，這波經濟景氣不能太早完結。
所以能夠做嘅，係將高度增幅減慢，長度再拉長，而非提早終結加息周期。此為第一層次。
美國2020年總統選舉，如果加息周期又係2020完結，經濟向下，共和黨就頭痕。
聯儲局有獨立決策權，但特朗普8次公開批評聯儲局主席鮑威爾，以總統人事任命權向其施壓，也就係希望將加息縮表周期壓扁拖長慢慢玩，起碼拖到總統選舉之後。油價70蚊時大叫話貴，對沙地留一手要其增產配合亦同此理。此為第二層次。
大宗商品超級周期、康德拉季耶夫長波周期很大機會接落嚟10年同時進入末段，即係熊尾。美國加息周期就算點拖，都無法拖得長過佢。
換句話，今浪美國經濟見頂之時，正好踩入上述兩個周期末段，就隨時唔止衰退咁簡單，而係有蕭條之虞。此為第三層次。
中美之爭越嚟越入肉
和內地人接觸過的應有同感，嗰件事如果佢哋唔做，好少直接拒絕，而係乜都話好但一路拖，拖到你做唔成為止。和談，係大家咁高咁大情況下先有和談，如果食硬你，不需要和談。
特朗普為了增加其支持度，需要表現出食硬中國；中國現下退避三舍，乃實力差距，否則即以對其他小國之氣焰處之。要真正和談，只有打到對方啃唔落先會有。因此中國如果想反制會係咩時候？就係周期轉折位。
美國停QE，準備開始加息時處於周期轉折位。當時中國想推人民幣入SDR權重，美國拖，結果中國以滙改震盪市場，令聯儲局史無前例官方放話，暗示中國行徑左右美國加息步伐。反轉去睇，如果中國想反制，最大機會在美國加息周期完結，經濟開始下行時做嘢。反制唔一定為贏，亦可以為壓止。
因此，長，未來10年；短，未來2、3年，中美大國之爭只會越嚟越入肉。G20峯會有偈傾，因為中國讓步。但最容易讓步的範疇今次讓咗，下一次就唔易讓，再下一次甚至無得讓。結果越後期，美國只能用越強硬、越激烈嘅方法打，除非美國放棄，而要美國放棄，唯有中國有能力反制。明爭緩和，暗鬥加劇，暗鬥最終又會再上番檯面。大爭之世已成形，東臨碣石，以觀滄海。
Mr. Tregunter
本欄逢周二刊出
大棋局 - Mr. Tregunter 舊文
來源 source: http://hk.finance.appledaily.com
