幣少爺症候群
2018年12月19日
觀望美國加息，美股先捱兩日插，港股沽售壓力本來唔強，只係交投少承接唔夠，美股首日下跌港股可以幸免，到第二日就點都要跟跌。
美國總統特朗普在儲局會議前夕再施壓，狠批儲局現時竟敢考慮加息。恒指昨日低開184點，報25903點，之後一度拗腰倒升64點，報26152點
。其後A股走勢急轉直下，恒指擴大跌幅，最多跌374點，低見25713點，收報25814點，挫273點；國指則跌121點，報10230點，成交680億元。
股王騰訊(700) 險守300元大關，低見300.2元，收跌近2%，報302.8元。隔晚外圍油價下滑，油股及油服股下行，另外內房股亦受壓。
栢能股價跟比特幣跌
市況交投唔多，中環茶友話題轉去呢幾日派錢派到惹官非的幣少爺，呢個年輕人喺網上炫富，派錢搶眼球，最後惹官非，變成「弊少爺」。媒體繼而大力追蹤，有人懷疑此舉是否促銷他的虛擬貨幣開礦機。茶友話，虛擬貨幣今年大跌，整個科網泡沫開始有點危危乎，幣少爺出此下策，多少反映泡沫潮中投機者的狀況。
幣少爺喺網上開礦採幣，主力推銷唔係主流的比特幣(Bitcoin)，而係一啲好冷門的新貨幣，呢類貨幣價值難知，你可以話好值錢，更大機會係價值等於零。呢類虛擬資產身價信則有、不信則無，變成好受市場資金供應影響甚至操控。今年比特幣由高位回落接近八成，跌勢仍然未止，主要係熱錢由炒家市場退潮，所以早前比特幣現金鬧出「硬分叉」爭議，被人質疑會令供應變相增加，成為市值大跌誘因，說穿了只係無熱錢護身，底子虛弱，一陣風就吹倒佢，呢個現象放諸科網股市場，可稱之為「幣少爺症候群」。
比特幣急跌，相關炒作概念都大縮水，最明顯係靠生產開礦顯示卡的上市公司栢能(1263) ，年初股價曾隨比特幣飆上7.75元，年中跟住幣值下跌，昨日跌到去2.16元，再跌多5%，累積跌幅同比特幣相差不遠。栢能因為生產顯示卡盈利大升，派發高息，現時市盈率不足三倍，公司都有點資產，股價都跌成咁，何況其他虛擬貨幣，係咪仲得人驚？弊少爺呢個時候出來派錢炫富，你話係咪好惹起猜疑呢？
一葉可以知秋，虛擬貨幣係網絡泡沫中最脆弱一環，凋謝得特別明顯。喺美息向上，全球央行收水下，其他新經濟股都面對挑戰，股價表現都幾嚴峻。昨日幾隻有咁上下規模的科網股美圖(1357) 、美團(3690) 都插低，美圖收報2.22元，急跌8.6%；美團收報48.15元，大跌7%，同時創出上市新低。
水退下美團再見新低
屬於第二隻「同股不同權」股份的美團發售價69元，9月首日掛牌收報72.65元，每手帳面賺365元，喺今年新股中算有交代，可惜好景不常，到月底已跌穿招股價，隨後股價反覆下滑。雪上加霜嘅係，今個月公司披露生態反腐處罰公告，包括內部員工、生態合作夥伴及共犯社會人員等89人，受到刑事查處，其中美團外賣渠道高級總監同時涉案。
公告指，自2018年2月至今，美團點評的業務、人事管理、風控、技術、資訊科技、內控、內審多個團隊調查違紀類刑事案件29宗，移送公安機關89人，其中內部員工貪腐以及其他違紀刑事案件11宗，涉案員工16人，社會人員14人。
公告亦提到，美團外賣渠道高級總監常某與代理商有不正當經濟往來，目前已因觸及公司高壓線，被解除勞動合同。好似美團的情況，喺公司高速增長時出現的內容管治問題，爆出來就令人對公司印象大減，喺資金撤退下，就造成踩多一腳效應。
目前科網股情況令人想起2000年狀況，係2000年前，美國聯儲局因為擔心千年蟲出現衝擊經濟，所以放鬆銀根，催生新世紀的科網泡沫。當千年蟲憂慮過去，儲局收緊銀根，好多科網公司爆破，出現汰弱留強，個別能夠捱過冬天的強者如亞馬遜終於成為大器，但爆破過程中科網公司幾乎係九死一生，連帶觸發起的不景氣，都令股市同實體經濟受影響，所以未來一年儲局點樣去調控呢個局面，將關乎好多新經濟公司的死活。
陸羽仁
金融High Tea 舊文
來源 source: http://hdfin.stheadline.com
