酒店股穩守待攻
2018年12月20日
美國議息結果出爐前夕，港股觀望氣氛濃厚，成交只有571億元。新經濟股繼續不濟，美團(3690) 創52周新低，低見45.2元，收跌4.4%，報45.8元；平安好醫生(1833) 亦創52周新低，低見29.15元，收挫4.3%，報29.8元；但資金有偷步竄入資
產股之勢，龍頭地產股繼續反彈。
美國傾加唔加息雖然未公佈，但美債之前已做好，等於預期明年加息幅度有限。市場睇法係今次加唔加息都好，來年加息三次機會都會下降，股票市場從來都係炒預期，當消息未證實，資金已經開始郁手。本地地產股早前開始小彈，彈彈吓昨日再彈高啲，長實(1113) 出現連彈，彈上58.2元，再彈2.4%，累彈接近8%。長實樓神趙國雄早前出來唱淡納米樓，外界有人質疑他公司是否已經大清貨，所以出來唱淡，呢個反應亦令人留意長實賣樓夠多，已經鎖定利潤，可能因為咁令長實股價表現強勢。
除咗長實之外，其他大型地產股表現都唔錯，新地(016) 收報114.9元，升1.5%，新地由低位累升近15%，若然兜到底都幾和味。恒基(012) 則升0.6%，收報40.2元。
年尾訂房情況佳
賣樓股趁住市區新盤開售有承接，兼且美息有可能升勢減慢而炒上，但即使聯儲局放慢加息消息得到證實，亦唔排除會有回吐，現在高追風險相對增加。另外，有中環茶友收到料，話近日酒店訂房相當爆滿，酒店平均入住率90幾個巴仙，有灣仔酒店入住率更達105%，即係租到突，做埋時租放租半日。酒店租房好景，咁酒店股係咪買得過呢？特別係好似隻朗廷酒店(1270) ，本身有6.9厘息，喺O依家風大雨大環境，酒店股好似升得唔多，似乎有得諗。
酒店股資產厚、派息穩定，本身有相當防守性，睇番外圍環境，資金陸續泊入呢類收息穩定的公司，以美股為例，過去炒科技股，好似P&G呢類衛生消費股唔吸引，但P&G股價由年中開始轉勢，反覆上升，由5月低位71美元，升到現時的92.5美元，升咗30%，表現相當悅目。
P&G喺呢段期間生意無大變，變的只是市場口味，鍾意佢呢啲現金豐厚的公司。市場資金由年初時風險胃納高，傾向增長型的概念股，轉而投向有穩定收入、有息派的公司，造就呢類公司受歡迎。從呢個角度，酒店信託派息高，在波動市場中有吸引力。
酒店股過去股價表現慢熱，主要原因係呢類公司回本慢，有酒店業人士亦同陸羽仁講，現時酒店收入好倚賴餐飲，由於食材同人工漲價，呢方面經營都有壓力。
不過，由於酒店股本身底子厚，加上息率高，下注呢類股價唔會發達，但候位買入，若然美息放慢腳步，都有機會先收息後賺價，作為落後目標有本身考慮價值。
三線城市取消限售
市場除咗觀望聯儲局議息，亦等候中央經濟工作會議，港股全日波幅只得141點。恒指收市升51點，報25865點；國指則跌34點，報10195點。大市成交減至571億元，為今年第二低。全日沽空81.58億元，沽空比率14.29%。山東省菏澤市傳取消樓市限售政策，為內地首個城市取消限售，帶挈一眾內房股反彈。華潤置地(1109) 升1.7%，報30.25元；中海外(688) 升1.1%，報26.85元；綠城(3900) 升2.7%，報5.63元；碧桂園(2007) 升0.4%，報9.23元。
個別發展市況下，幾隻有壞消息的股份持續受壓。被狙擊後在市場出手回購的恒安(1044) 仍未止瀉，一度低見51.8元，收報52.4元，仍跌2.5%。恒安昨日在市場買入132.25萬股，每股作價53.6至54.65元，涉資7142萬元。手機設備股方面，瑞聲科技(2018) 遭瑞信降級降價，股價受壓，一度低見45.5元，創35個月新低，收報46.2元，仍跌4%。
另一隻受累大跌股份係栢能(1263) ，股價大插12%，收報1.89元。幣少爺搞到虛擬泡沫大受關注，做顯示卡的栢能都受到牽連大插。
陸羽仁
金融High Tea 舊文
來源 source: http://hdfin.stheadline.com
