笑到最後 - 高明 2019年1月28日
笑到最後：樓市小陽春是真的 - 高明
適中字型 較大字型
近日市場開始流傳「樓市小陽春」一說，最新公佈中原城市領先指數（CCL）按周升0.26%報170.64點，今日同大家跟進嚇今次係小陽春還是小陰冬。
綜合坊間報道，「樓市小陽春」至少有三個層面。第一，成交回升，主要因為有新盤劈價而令買家重現；第二，劈價盤未必能劈得落，賣家叫價企硬；第三，預計農曆年假後樓價上升。
其實頭兩者，都唔係樓市小陽春，因為小陽春必須要有價格上升。一間夜冷舖執笠大減價，賣多咗產品，老闆見生意旺返，唔執住，加返價，即刻冇人幫襯，都好難稱之為「夜冷舖小陽春」。所以最緊要係第三，農曆年假後，樓價指數會唔會普遍咁回升。睇兩個指標，高明認為，樓價反彈機會極高，樓市小陽春將會是真的。
舊年11月本欄寫過，樓價最重要嘅一粒數，係今年2月嘅失業率，因為1997年同2008年都係樓價見頂後7個月，失業率終現跌勢，影響供樓能力。可能有人會話，樓價已經同本地就業脫鈎，失業同樓價冇關。咁諗當然大錯特錯，因為一間公司如果長期要減薪裁員，公司本身生意都唔好，就算影響唔到大股東身家，肯定投資情緒都冇咁高漲。
入返正題，最新公佈2018年10月至12月嘅失業率係2.8%，按季一樣，都幾近肯定今年首季唔會大幅上升。當大部份人有工開，有能力供樓時，冇掟貨需要，就為樓市造咗個底，有條件唔掟貨住。
但以上都只係防守，真係會令樓價反彈，就係股市。港股同樓市其實關係不大，反而港樓同美股，無論拉長十年，定係只計今年走勢，都何其接近。美股由低位反彈14%，推測應有預視作用，因為買樓要綁死，唔似買美股自出自入，反彈情緒冇咁亢奮，保守估計港樓反彈幅度最多7%，以中原指數計即重上182.1點。
高明
http://fb.com/bigricetea
本欄逢周一刊出
笑到最後 - 高明 舊文
來源 source: http://hk.finance.appledaily.com
