智取大市 - 晉佳 2019年1月28日
智取大市：人民幣價量齊升 - 晉佳
人民幣正處於價量齊升狀態，皆因市場對人民幣有信心。 資料圖片 適中字型 較大字型
港股升勢勁之餘，二三線股炒風更加旺到不行。需知道市況越好、人民幣越強，理論上美國下月有條件同有必要出更大打壓中國招數，然後中國就會越放水，務求出盡法寶去頂住美國嘅攻擊。
雖說下月係中國放水同中美糾紛一正一反因素角力嘅meantime，但現階段距離負面因素如此接近，市場風險胃納仍能提升，估計下月即使美國全方位徵收中國貨25%關稅、為股市帶嚟震盪，中線仍可以保持正面資金流。
中國放水加上人民幣滙價升，有幾利好？打一個比喻，你係一間小鎮開麵包舖，平日你賣一個麵包（人民幣）10蚊，可以賣出10個，收入就係100蚊，理論上，麵包多咗，就要賣平啲吸引人買多啲。但有一日，你推11、12個麵包出嚟賣（放水增加貨幣供應），竟然可以用11蚊賣得曬（人民幣滙價上升）。目前人民幣正正處於呢種價量齊升嘅狀態，要解釋就歸因於市場對人民幣信心。
目前恒指9日RSI升到72.9以上，如果恒指直線上升，相信去到28000點左右就會進入RSI上到80嘅技術超買水平，到時投資者會計計數，再睇埋2月中美大結局，短期沽壓始終會來，仍不能掉以輕心。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com
