智取大市 - 晉佳 2019年1月4日
智取大市：平到離譜的股份 - 晉佳
市面上估值跌至離譜水平嘅股票為數仍少，華晨係其中一隻較離譜嘅。資料圖片 適中字型 較大字型
環球股市擺脫輪動熊市，全球進入更全面嘅跌市，當全球股市資金一齊抽緊，情況就似一個雪球向下越碌越大、越碌越快，短期跌勢更難停得到，途中更難回穩、更難有反彈，環球股市亦普遍有跌幅加快嘅跡象，對於等機會嘅讀者嚟講，跌得快又未必是壞事，因此機會可能更早出現。
港股即使指數唔點跌，個股單日仍少則1、2%，多則6、7%咁隊，原因係港股指數夠平，但二三線股只要有返啲質素嘅，估值仍遠離反映悲觀劇本水平。舜宇（2382）跌咗咁耐，中美科技冷戰之下，長遠盈利增長可測性大降，仍賣緊2018年預測市盈率19.5倍。吉利（175）俾大摩唱淡目標價8蚊，現價12蚊相當於市賬率2.4倍左右，如果計普通汽車股下跌周期估值，亦有排未算。講悲觀，股價高位跌咗六、七成，仍未接近非理性跳樓價，之所以沽極都有。
市面上估值跌至離譜水平嘅股票為數仍少，其中一隻較離譜嘅係華晨（1114），講緊290億人仔賣25%華晨寶馬，即使賣完套現再減債至零計息負債水平，將剩餘現金全數派息，都幾乎完全抵得過現股份市值，即係剩返25%華晨寶馬幾乎唔使錢送畀你。不過，離譜個案似乎未夠多，隨住跌市繼續，就會有更多離譜個案出現。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com
