智取大市 - 晉佳 2019年2月27日
智取大市：槍打出頭配資黨 - 晉佳
A股近期爆升，相信係習近平進行新一輪派餅行動，夠鐘向利益集團餵食，維穩政權至係真章。 資料圖片 適中字型 較大字型
近兩個月升市，除咗炒定中美糾紛降溫，亦反映咗中央維穩股市救國行動嘅效應，A股炒到連配資業務都死灰復燃，短期中央必須降溫。投資者近排養成咗強勢股一見回吐就買嘅習慣，見隻中糧肉食（1610）3日內由高位快速急回兩成，即刻單日反彈返7%，京信通信（2342）亦冇得跌深啲。不過，今勻喺A股投資者炒到癲曬之際，中央點都做嚇嘢，絕對有誘因要唞一唞。人氣股係咪短線跌一兩成就買嘅玩法，開始有少少保留，寧願博呢轉回深啲，先至再撈。
如果講救市維穩咁簡單，呢個水平應該收夠籌，冇必要再花氣力再谷高成個市。不過，今次A股絕非單純維穩，而係習近平進行新一輪派餅行動，夠鐘向利益集團餵食，維穩政權至係真章，於是呢一轉升浪斷不似呢個位就可以完結，習近平2015年、2017年谷高股市派餅嘅track record，或可延續。大反彈完結，嚟緊仲係大漲小回格局。
之前經濟周期股完全弱勢，未知下一浸會唔會由經濟周期股Pickup，斷估機會不低，皆因股市再升，就有人相信經濟都復蘇。豬肉股升到爆廠，做味精嘅阜豐（546），中美糾紛降溫、食品通脹概念俱備，有條件追落後。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com
