中環在線 - 李華華 2019年3月5日
中環在線：八達通高層為交津捱更抵夜 - 李華華
在領取交津開通前嗰一日，八達通一眾高層都留守command center。 適中字型 較大字型
相信大家都已經拎咗公共交通費用補貼（簡稱交津），原來背後system唔簡單。要確保系統唔冧檔，一嘟就拎到錢，八達通公司行政總裁張耀堂（Sunny）話，開通前嗰一日佢同一眾高層留守command center，枱面放滿保溫壺、咖啡，就知道佢哋捱更抵夜。
為免掛萬漏一，公司仲安排200名員工到全港補貼站作最後測試，大家對準時間，淩晨12點，就拍卡拎錢，最後發現有3部機出現小故障。負責駐守該站嘅同事就慘啦，要去附近茶餐廳打發時間，人哋舖頭都打烊，佢都仲要等補貼站回復正常，先完成任務，實在要畀啲掌聲呢位人兄。
唔單止公司上下，連員工老公老婆細佬阿妹都非常幫手，Sunny話，囝囝成功拎到300蚊補貼，仲拍片畀佢睇。Sunny同華華講，已經有逾七成人領取咗1月份嘅交津，佔總補貼金額嘅八成。
呢個大project順利推出，但管理層又開始忙第二樣嘢。Sunny預告將會夥拍Mastercard喺本月內推出虛擬預付卡，畀用戶網上消費。華華聽講，預付卡須與八達通電子錢包綁定，消費上限為1萬港元。
李華華
mailto:LiWaWa@AppleDaily.com
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
