沽本地股換中資股
2019年03月05日
港股喺29000點關口前打底，噚日雖然再度闖關失敗，但內地股市勢如破竹，上證指數收報3027點，升1.1%，企穩3000關樓上，創超過八個月以嚟新高；深成指數就收報9384點，升2.4%。內地市場交投繼續熾熱，兩市成交增至近1.05
萬億元人民幣。買入A股指數基金嘅投資者，輕輕鬆鬆再下一城，南方A50(2822) 同華夏滬深300(3188) 等幾隻指數基金，分別升1.1至1.7%不等。
港股開市稍為造好，午前升幅擴大，動力係嚟自彭博引述兩個消息人士，話中美好快達成協議，如果雙方能夠握手，美國會撤回大部份或全部對中國加徵嘅關稅。中美談判有突破，原因據講同陸羽仁預測嘅差唔多，就係美朝峰會食白果，特朗普急於要有好消息，於是快馬加鞭推進貿易協議。
從O依家透露出嚟嘅說法，美國又將重點放喺購買大宗商品，同之前強調要中國做結構改革有咗轉變。北京O依家態度係增購商品，減少貿赤冇問題，要有好大結構改革，同要保持人民幣匯價唔跌，兼有懲罰機制，就難傾一啲。若然美國願意鬆少少，達成協議機會就明顯增加。
友邦領展破頂回吐
美朝峰會冇成果，對特朗普壓力都幾大，返國後佢隨即開火，針對聯儲局嘅縮表計劃，唔點名批評主席鮑威爾沽債計劃。特朗普嘅態度，顯示佢期望股市向好，同埋不斷炮製好消息嘅企圖。
港股受消息帶動連升兩日，恒指一度上破二萬九關，最多飆429點，見29241點，再創逾八個月新高，早前高位入貨嘅投資者開始食胡，二萬九得而復失，收報28959點，升147點；國指收報11575點，揚68點。大市交投連續九個交易日過千億元，成交1489億元。
藍籌股石藥(1093) 收彈4.4%，報13.84元，係升幅最大藍籌股；港交所(388) 收升1.4%，報279.2元。多隻大股創一年高位，交行(3328) 高見7.06元，收升4%，報6.9元；招行(3968) 高見38.9元，收升2.3%，報38.1元。
不過，友邦(1299) 雖然再創新高，高見79.85元，但收跌0.6%，報78.5元；領展(823) 都創上市新高，高見91.8元，收市無升跌，報90.1元。由本地創新高股份隨即回吐，可見投資者食胡換馬，所以拖低咗大市升幅，亦可見醒目資金沽出穩陣嘅本地藍籌，追入中資股嘅炒落後策略。
市場炒落後招數，其一係跟住政策行。兩會召開前夕，內地科創板上市細則出爐，科網股借勢炒高。美圖(1357) 收飆11%，報3.69元；金山軟件(3888) 收飆9.4%，報17.2元；閱文(772) 收彈4.3%，報40元；平安好醫生(1833) 收漲3.9%，報47元。應咗內地搞科創板，香港同類股份減少競爭有得炒嘅理論。
體育股板塊隨大市向好，安踏(2020) 股價創上市新高，高見49.5元，收報49元，仍升4.6%；該集團去年盈利41億元人民幣，按年增長32.9%；收益241億元人民幣，按年大增44.4%；毛利率增加3.2個百分點，至52.6%；每股盈利為152.8分，按年升30.6%。
另一隻體育股李寧(2331) 亦造好，收升0.7%，報11.42元。李寧係內地最早打響名堂嘅體育股，一度因為過度擴展面對困境，但喺創辦人李寧親自出手調整策略後，近年表現回勇，股價去年下半年持續向好。
李寧將力谷非凡中國
有熟悉公司人士話，李寧為咗支持公司，曾經進行股權重組，把手頭股份全數注入非凡中國(8032) ，O依家李寧復甦，相信佢下一步會大力催谷非凡中國。非凡中國早前喺內地收購一隊電競戰隊，年內會優先喺大灣區物色新主場。
非凡中國上月收購內地知名電競戰隊Snake，該隊係遊戲《英雄聯盟》職業聯賽嘅一支勁旅，比賽模式同籃球、足球等聯賽差唔多，O依家主場喺重慶。李寧話，收購後將重新經營該戰隊，並正喺長三角同大灣區多個城市物色新場館，其中優先考慮今年落戶大灣區，因為該區具強勁影響力，人才集中，而且接近香港，方便公司處理業務，消息公佈後非凡中國收報0.58元，升1.8%。
睇返非凡中國股價，過去半年同李寧啱啱相反，不升反跌，主要係公司轉主板計劃未成功，令非凡中國資產折讓加大，睇到呢個情況，就明白點解李寧要落足心機，谷好公司表現嘞。
陸羽仁
金融High Tea 舊文
來源 source: http://hdfin.stheadline.com
