【異動尋寶】經典股票撲傻瓜遊戲（魏力）
rare earth 稀土更多
炒股票可以有幾兒戲？昨日的中國稀土，真係一個經典例子。
中國稀土（769）昨日最多狂飆1.3倍，埋單升108%，成交接近6億銀，而整間公司市值才18億，一日換手率36%。點解升得咁誇？比較「靠譜」的原因，係今個月開
始，大陸暫停由緬甸進口稀土，令供應下降，帶動價格上漲。查返稀土個價，近排的確有升，但點解5月頭唔炒，去到今日先飛？
原因可能同習大大去江西考察稀土有關。貿易戰2.0如火如荼，但阿爺似乎是「聲大大、無貨賣」，大家都揣測緊，究竟阿爺會點反擊美帝？一見習主席在此時睇稀土廠，即時就諗打「稀土牌」，無限FF認為會以禁止稀土出口美國作報復（稀土是製造晶片的原材料）。
查實大陸自70年代開始出口稀土，已經挖咗一大截，家陣存量只佔全球三成，雖然仍是第一，但排第二的美國亦佔15%，兩者差距並非太遠，假如大陸真的禁運，美國都可以同其他國家買，唔會徬徨無助，所以呢張稀土牌究竟係好牌定爛牌？自己諗。
OK，講返中國稀土（769），本身無稀土礦，亦無向美國賣稀土，只係生產稀土氧化物。咁都炒？明顯係因為個名有「稀土」兩個字，仲要係「中國稀土」，齋睇名以為實中，有班友開始做勇士衝高咗，之後技術派／狗衝派魚貫進場，就係咁，一隻唔關事的細價股，咁就飛升一倍。
很明顯，昨日的中國稀土是一個「撲傻瓜」的遊戲，你傻唔緊要，只要有更傻的人、用更高價接你火棒就OK。咁你點知自己唔會係最後接火棒個位？其實係事後先知，食到糊咪天才，否則…應該又係牆紙一張。
短線上升，原因可以好荒謬（甚至永遠唔知原因），只要隻股夠細、收到乾哂、蟹貨不多，又有班人帶頭衝入去，開市早段升得夠癲，就會成為當日市場焦點，一浪一浪湧上去。
呢類股應該點樣炒？零基本因素之下，都係睇圖喇！開個3分鐘／5分鐘圖，睇住10分鐘線，只要係開市早段，個價唔係拋離條線太遠，或升一浸後回到10分鐘線，就可以小注試嚇，直至升勢轉急、拋離10分鐘線太遠（例如現價高於10分鐘線一成以上），就應該沽出，不要貪勝不知輸，一心博大茶飯，只會中伏收場。
筆者為證監會持牌人，未持有上述股份權益。
www.facebook.com/2012jason
異動尋寶 - 魏力 舊文
來源 source: http://hk.finance.yahoo.com
