收市閒情 - 千頌C 2019年5月22日
馬上成為壹會員
會員註冊/登入
【收市閒情】沒收熊貓復仇大計 - 千頌C
中美貿易戰拳來拳往，打到中國連熊貓牌都要出。資料圖片 適中字型 較大字型
中美貿易戰，特朗普拳拳到肉！中國泱泱大國，又點會容忍被外敵欺壓而唔還手？於是，中國開始出牌了！
第一招，美國加中國2,000億美元貨品關稅25%？偉大嘅中國當然奉陪，一樣加25%！當中方一邊講，「談，可以！打，奉陪！欺，妄想！」，另一邊廂，閂埋門開個會，最後只係加美國600億美元貨算。
好，第二招！哼！你徵我關稅呀搞我華為，我沒收你兩隻熊貓！真係唔係講笑，話說中國過去22年，一直有出租大熊貓「白雲」畀美國聖地牙哥動物園，後來「白雲」六年前仲生咗個仔「小禮物」，兩母子一直喺美國生活得樂也融融。點知去到近日，中方突然唔肯再續約，仲已經沒收兩隻熊貓。喺貿易戰打得如火如荼之時，「白雲」、「小禮物」就被「送中」。情侶分手都會收返送出去嘅嘢啦，更何況中國同美國有親咩？熊貓喎！國寶喎！當然要收返！
第三招！你要打貿易戰，我唔畀你播《權力遊戲》第8季大結局！呢招狠毒呀，本來騰訊（700）自2014年起《GOT》版權，獨家播足咁多年，去到第七季，更加係同美國同步「零時差」播放。點知去到噚日，臨播大結局前一粒鐘，騰訊視頻竟然話延播，仲要唔知幾時有得播。
話說最近中國都開始打媒體愚民戰，原定前日播出新劇《帶著爸爸去留學》，因為有大量美國場景，亦都冇得出街。咁都唔止，近幾日央視黃金時段8點檔，已狂播「抗美神劇」，實行全民洗腦齊抗美！
當中美貿易戰，打到中國連熊貓牌都要出；甚至打到要習近平山長水遠走去江西考察稀土，超級明顯地擺個姿態同全世界講，「你再搞我，我就搞稀土戰，問你死未？」。咁你就知道，中共仲有幾多牌可以打。
不過，真心想講一句，中國延播《權力遊戲》呢隻牌打錯曬，超錯。明明你只要一播結局，播一個爛到反枱嘅結局，所有中國劇迷應該都會嬲到即時大叫「美劇是垃圾！」，咁咪可以令中國上下一心抗美囉！錯曬！
千頌C
http://fb.com/winbigwok
本欄逢周三刊出
收市閒情 - 千頌C 舊文
來源 source: http://hk.finance.appledaily.com
