冰說聰明 - 青冰 2019年6月6日
【冰說聰明】尋找領展入市位 - 青冰
領展主席聶雅倫。 資料圖片 適中字型 較大字型
五窮月之後大家都變窮了，指數單月跌一成，個股跌兩成樓上並不稀奇。前輩教落，買股一定要買強勢股，咁點為之強勢呀？以五月來講，跌2至3個百分點已經好強，如果埋單係升就係超強啦，若果佢升之餘仲要挨近52周新高，仲可以點形容呢？無錯，就係講緊領展（823）。
領展屈機之處，相信已不需多講，剛在周一出嘅業績，亦已有好多專家為你分析，不贅。較引起青冰注意的是，公司今年有特殊收益，沒選擇派特別息，而是公佈將適時回購6,000萬股，以現價計，將價值57億元，如以總股本21億股計，等於每股2.7元。不過，熟知領展的戰友都知道，管理層甚少在貼近52周高位去回購嘅，真係未畀基金股東小過咩，對上一次回購是今年1月，而出手個價，就係近年所出的最高價，79元正。
資產類股份是否抵買，市賬率就最多人用作指標，低於1就代表股價比每股NAV還要低，屬抵買。青冰搵過料，領展較少在市賬率高於1時出手回購，就以年初1月為例，雖然79蚊已是接近當時的52周高位，但以當時每股NAV 85.4元來計，市賬率仍低於1。不過都唔係完全未試過嘅，2018年1月至3月間，都偶爾會高於NAV價出手，但在此之前的兩個月，領展就公佈以230億元出售商場物業，所以大家當時睇到的市賬率大過1，只係這個NAV仲未反映箒。
自2015年至今，領展的市賬率低見0.79，高見1.11，以每天平均價計，係0.93，剛公佈的NAV是89.48元，市賬率為1.07，高定低可自行參透，但如果戰友認為貿易戰會帶來終極一跌，咩位入貨係有數得計，而每次八折九折都不是一兩天，是持續數星期甚至幾個月，屆時兵慌馬亂或者你唔敢撈，但今次就肯定有6,000萬股等緊機會囉。
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://hk.finance.appledaily.com
