操盤手札記 - 割柑人 2019年9月3日
【操盤手劄記】血腥暑假未完結 - 割柑人
港人經歷血腥暑假，留下裂口難以修復，走勢上，正朝攬抄進發！
資料圖片 適中字型 較大字型
踏入9月，香港內憂外患持續。對外，中美關稅戰如期升級；對內，24個行業罷工、學生罷課。本來林鄭政府只要回應市民訴求，內憂即會降溫，撤回、徹查係基本盤，但林鄭唔做，咁612、721、811、831留下嘅裂口難以修復，走勢上，正朝攬抄進發！
港人經歷血腥暑假，港股何嘗唔係，而且短線唔似會完。上周，中美都放風想埋枱再傾；不過，雙方邊打邊傾已經超過一年，市場未寄厚望。周一，港股跌0.4%，收25626。恒指上周四出現歷來第28個「終極死亡交叉」，過往經驗，一半比率再跌一成以上。
上月，港股累跌7.4%，跑輸全球主要市場；同時，人民幣累跌3.6%，創1994年滙率並軌以嚟最大單月跌幅。港股下跌原因之一，正係資金撤離人民幣資產。人民幣貶值，旨在抵銷關稅加碼後嘅外貿壓力。人民幣走低，不利中資股以至港股。
逆權運動由6月拖到嚟9月，同投資季節中最艱難嘅月份重疊，6月已經「六絕」，9月原來仲絕。以港股過去20年平均回報計，9月係最弱嘅月份，平均回報-1.24%。至於美股，過去20年亦係9月最弱；睇埋VIX指數，過去30年最波動則係9月至10初。
相對嚟講，9月仍可憧憬美國聯儲局減息，股市壓力略可紓緩，10月風險比9月大。港股正值內外交困，不明朗因素充斥，投資取態宜審慎，以守為攻。若想吼位低吸，喺環球息口趨降下，宜揀有穩定現金流、穩定派息嘅收息股。收息股中，公用股係穩膽，當中，領展（823）雖然息率唔算高，但勝在有漸進式派息政策，2005年尾上市以嚟，派息年年增加。該股早前曾經急升，息率回落；近排回調，息率回升，現價86.15元，預測息率重見3.5厘，可重新考慮。
割柑人
本欄逢周二刊出
操盤手札記 - 割柑人 舊文
來源 source: http://hk.finance.appledaily.com
