Hea富生活 - 郭釗 2019年12月5日
【Hea富生活】港航危機之形成 - 郭釗
香港航空服務不濟，流失客戶不難理解，睇怕不難成為第二間甘泉航空。資料圖片 適中字型 較大字型
香港航空（下稱港航）財務有問題已不是新鮮事，上年同樣時間，正值日本雪季，跟一班朋友訂機票到北海道滑雪，朋友提議坐港航，皆因商務票價比國泰平3,000蚊，我即時say no，因早幾年前一次經驗，決定以後不坐港航。
事緣當時北海道大風雪，我坐架機18:35起飛，成功check in入閘上機，心諗都算好彩啦，但眼見一架又一架其他航空公司的飛機飛走，連本應遲我們半小時起飛的國泰都走了，我在機上呆等五、六粒鐘後，被通知太大風險飛唔到，要全部人落機明天再續，唔好彩都冇得怨啦……誰知落機後，眼見其他航空公司包括國泰有旅遊巴接送旅客到劄幌入住安排的酒店，而我們則需要自己坐JR出劄幌，機場零的士的情況下，趕上近乎停駛的電車，用了兩小時才出到市區，再轉乘的士到指定酒店。翌早9時前又要返機場等通知，但到酒店時已經接近清晨三、四點。
後來業內人士估計，出現以上情況的原因可能是：港航機師薪酬較低，經驗不夠，所以未能起飛；大航空公司在世界各地配套較好，容易得到更佳安排，而且出得起人工，職員應變能力亦較快，能提供更好的資源給客戶。
港航服務如此，流失客戶不難理解，尤其是最賺錢的高端客戶，加上近年長期傳出財困，出糧都要拖。香港人出外旅行都是每年重中之重的任務，會否因為平些小，去預訂不知道到時會唔會執笠的機票呢？生意只會越來越差，聽聞家陣坐港航連電影和娛樂都Cut埋，搞成咁，睇怕不難成為第二間甘泉航空。
郭釗
http://fb.com/heaology.edu
本欄逢周四刊出
Hea富生活 - 郭釗 舊文
來源 source: http://hk.entertainment.appledaily.com
