今次武漢肺炎（WARS）嘅急跌及其後反彈，都係日後金融教材嘅必讀。
假設你係中國大好友，
認同肺炎死亡率少過美國流感、一睇就知西方勢力別有用心渲染、中國好強大。如果用呢個角度去睇，點解1月底股市會急跌兩千點？年年都有流感，又唔見舊年因流感大跌？如果你係支爆派，則解釋唔到WARS確診人數上升，狂搶口罩，但近日過千點反彈。另一派則係「有效市場派」，覺得價格已經反映曬。但呢派解釋唔到，由12月初大家知曉武漢有怪病，港股一路升，到1月更加明知WARS冇藥醫，都係照炒，直至中國政府公佈先會跌。
今次港股案例，完全反映港股走勢，同有線採訪幾個大媽大叔一樣，當WARS喺九萬幾里遠時：「相信政府、唔怕！口罩都唔買唔戴」；到殺埋身就搶口罩廁紙可樂。冇錯，炒港股嘅人，只係一同班搶廁紙嘅人，著咗西裝，本質上完全冇分別。
WARS要幾嚴重先觸發下一輪恐慌？可能性有：一、WARS變種汙染食水水源，好似SARS咁留喺屋企都會致命；二、WARS傳染性令醫療系統癱瘓，令其他非致命病嘅病人失救而死；三、WARS死亡率低過流感，完全受控，兩年2,000億美元買美國貨夠期埋單。
其中，高明認為第三項最有機會跑出。雖然有傳媒放風疫情為苦肉計，美國會彈性處理，容許中國延遲買美國貨。但話事人特朗普發放「正能量」，大讚中國抗疫能力，加上中方早已視武漢肺炎如流感，美國財長姆欽都話疫情唔會影響中國履行貿易協議。但係正如上面所講，港股會喺發生一刻先會反映。
大家可能會問，如果有主要官員感染唔通唔嚴重咩？點解你唔提？因為到時會更嚴重，我驚有排升！
高明
http://fb.com/bigricetea
本欄逢周一刊出
笑到最後 - 高明 舊文
來源 source: http://hk.entertainment.appledaily.com
