美國限制14日內曾前往中國嘅非美國公民入境，令美股下跌2%，值得留意係，港股黑期同時只下跌約300點左右，單日計跌幅少過美股。A股決定周一開市，唔延遲多一星期，復市沽盤將集中A股，喺A股休市期間，以
安碩A50（2823）為例，跌咗7.5%，可以作為A股復市表現一個參考。
人行預備以1.2萬億人幣逆回購防洪，同時推出30條較有針對性嘅措施，好過冇亦好在唔似越幫越忙，可能係監管機構買過5年前嘅教訓，算係一種進步。監管機構今次唔似再做搞屎棍，對市場嚟講，已經算係釋除一個潛在負面因素，港股亦唔會成為唯一提款對象，至少嚟緊呢個星期，形勢會相對上一星期好轉，估計會由一面倒跌市轉變為大型上落市。應對呢種市況，至少要執倉換馬去強勢股，因為股市大動盪只會令強股加快拋離弱股。弱股只會比之前更弱，喺大型上落市裏面仍然會感到舉步維艱。
要注意一點，A股復市之後，任何武漢肺炎嘅消息都會成為股市大幅上落嘅藉口，中央自然會利用呢一點，去為股市維穩以至舞高弄低，例如發放一啲封關鬆綁時間表等等。短期而言，去到投資者對於疫情警戒性降低，或者有好消息之時，反而係短線出貨時機，因為疫情點都捱到4月，總會有排chok，唔會喺咁長時間內無止境下跌的。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com
