「等沙士價我就入市！」，舊年6月前唔少人都會咁講。到武漢肺炎爆發，相同嘅說話已經唔見有人講。
客觀上，沙士價係香港嘅心病，當年可以跌到此價位，總覺得他朝有日可以用同樣嘅價錢買入，然後價格上升絕塵而去。
點解會出現呢個效果？因為沙士暴跌只係當年抗疫經歷太深刻，心理上以為當時嘅跌市單一原因係沙
士，實際上，沙士已經係跌浪水尾。翻查數字，2003年恒指全年上升34%，由2月中國教授將沙士傳入香港，到6月底世衞將香港從疫區中除名，恒指2003年首兩季其實還要上升2.7%。
樓市反應則較慢，要到03年第四季才止跌回升，但全年計，中原指數仍升3.46%，因為當時只有37點。股樓一樣，真正大跌是在00年至02年，港股由16962點跌至9321點。沙士反而發出一個清晰訊號：最差原來就係咁。之後股樓都未見過同樣嘅價錢。
今次疫症對投機最大啟示，就係大家12月時已明知武漢肺炎已出現，股價一路炒上，直至政府公佈疫情，恒指才突然由兩萬九急跌。
之前講過，貿易協訂一簽，要靠炒高股價去協助找兩年二千億美元的協議條款，現時睇已冇能力製造牛三，睇錯了，要認。同樣市場反應，當日市場當協議係好消息炒，到找數時無法履行，市場又會好似今次咁見到先跌。
「沙士價」嘅重點，係經歷危機後香港地位不變，立即見底回升。今次疫情走到超市，好多人慨嘆香港點解要搶口罩搶糧。經過過去7個月，大家都知國際金融中心地位係人哋畀面。如果更多國家決定將香港視作中國一樣，一同封關，外人覺得中港冇分別；加上香港咁水皮，連自己人都唔敢留低長遠發展。跌完升唔返唔算「沙士價」，何況現時失業率3.3%，2003年係7.9%，有排未到「沙士價」。
高明
http://fb.com/bigricetea
本欄逢周一刊出
笑到最後 - 高明 舊文
來源 source: http://hk.entertainment.appledaily.com
