異動空間 - 魏力 2020年2月3日
資料圖片
武漢肺炎肆虐，過年唯有在家煲劇，找來去年評價最高的紀錄片HBO《切爾諾貝爾》，越睇越心寒，因為「切爆」同武肺實在太似，一路睇，我只想記阿寶：人類總要重複同樣的錯誤。
相似在哪裏？一個字：瞞。核爆本可避免，錯在一個無知識、又好大喜功的核反應堆主管，為顯示自己的領導能力，在準備不足之下硬推測試，引爆連鎖反應導致災難（劇透到此為止，有興趣自己搵片睇）。
今次武肺，12月尾已爆出疫情，內媒亦廣泛報道，但一直至1月中，湖北當局仍說「無人傳人」、「無醫院受感染」、「可防可控」，若無其事繼續春運，更智障地搞場「四萬家庭團年飯」集氣抗疫，結果？就係封關前500萬人四散播毒，瘟疫蔓延全球。
假作真時乜都假，連自己都呃埋，後果係點？《切》片末段引述戈爾巴喬夫認為，核災是導致前蘇聯加速解體的原因。今次「生化版切爾諾貝爾」，同樣你瞞我瞞，但人在做、天在看。
回說大市，瘟疫失控，隔晚美股再頂不住地心吸力，恒指黑期再挫300點，去到26000大關，較A股放假前瀉足1,900點（約7%）；以南方A50（2822）比較則瀉7.9%。A股周一復市難逃一冧，但魏力觀察不少大藍籌，已跌近重要支持位，技術上將現反彈，但能否成事？看A股之餘，更看美股。
魏力
http://fb.com/2012jason
本欄逢周一、五刊出
異動空間 - 魏力 舊文
來源 source: http://hk.entertainment.appledaily.com
