兩三日都等唔切，美國聯儲局再喺議息前突然減息，更重啟量化寬鬆（QE），市場不喜反驚，美股期貨跌停。武漢肺炎疫情對經濟嘅
傷害，比表面更大鑊，非急救不可？事實上，隨著疫情全球大流行，環球股市恐懼鬥「質」，已演變熊市大流行。
今趟係聯儲局喺兩周內第二度緊急減息，此前七個半月，已累計減息1.25厘，連同今趟減息1厘，聯邦基金利率降到0至0.25厘。睇嚟就快實現美國總統特朗普半年前嘅願望——負利率，當日佢鬧爆聯儲局，話唔減息至負利率就係笨蛋（bonehead）。
聯儲局再出重手，顯出高度關注上周喺股市、債市出現嘅流動性緊縮，因而試圖防範信貸市場出現衝擊，並向其他經濟環節擴散。放水雖可紓緩疫情衝擊，但即時對實體經濟幫助唔大，疫情令經濟活動收縮亦唔係放水可以解決，更遑論解決疫情。
市場擔心疫情未退，聯儲局已耗盡子彈，面對衰退，有咩彈藥救市。事實上，睇番中國，疫情雖漸受控，但經濟所受衝擊浮現。統計局公佈首兩月消費、工業、投資數據，三駕馬車都死火，大幅負增長，形勢差過2003年沙士，甚至係半世紀最差。
周一，中港股市分別大跌3.4%同4%。恒指一度低見22842，收23063，日線圖呈身懷六甲，處於上周五嘅波幅22500至24200之內。恒指上周五低位剛啱觸及由2008年低位10676延伸嘅長期上升軌支持位，隨即反彈，有短期見底跡象。
市況波動，抄底有風險，短炒博反彈，宜小注怡情，切勿借孖展；若睇長線，亦要控制注碼，分注吸納。疫市投資，可留意中國救市政策受惠股；此外，歷史上大流行疫情，往往會令健康環保意識提升，相關股份亦可留意。
割柑人
本欄逢周二刊出
操盤手札記 - 割柑人 舊文
來源 source: http://hk.entertainment.appledaily.com
