聯儲局減息一厘，再印五千億，兼再借大量美元畀世界其他地方嘅央行，等佢哋可以再借畀自己啲銀行周轉。結果？美股指數期貨跌停板。
孫柏文唔知啲美股
會否裂口低開後最尾回升。不過如果出到咁重藥都仲要跌，唯一能拯救資產價格嘅方法，就係將貨幣嘅購買力摧毀。
最慘就係就算摧毀貨幣購買力，都不能將人體溫度維持喺37度。
點都好。如果問我點解咁印法，啲嘢都係繼續冧價？最直接嘅解釋方法係就算借錢冇利息成本，都要還本啩？而如果買咗嘅嘢會跌價，就算負利率，都唔會借錢買啦。啲公司借咗錢都還唔到，央行再塞錢落啲銀行都唔會借出去。
現時嗰啲之前借咗好多錢嘅企業，突然生意額大跌，甚至冇曬。點算呢？啲人問我：「滙控（005）股息率好高喎，買唔買得過？」我答：「派息？不如諗嚇你買咗後使唔使供股仲好啦。」喺咁嘅情況下，零厘那又如何？
睇蘋果，佢哋話大中華區以外嘅蘋果店全關。問題係，睇大陸冇錯好成功控制疫情擴散，不過係咪可以唔再控制呢？一放，會否令疫情再爆？
睇各地政府，甚至香港、新加坡等，唔出街為常態。直至有藥醫為止，即係啲公司個個都會繼續好大鑊。點買？以前嘅世界，喺咁嘅情況一定現金為王。不過當央行們全力亂印，又會點？亂局，未覺有得博。
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://hk.entertainment.appledaily.com
