聯儲局不負眾望，重新開啟另一輪QE。星期一亞洲時段，港股及道指
期貨仍跌約千點，市場似乎對QE唔埋單，但熊市反彈亦相信將至。此際聯儲局主要做咗3個動作，減息、回購、QE，以下分述。
減息其實已冇人理，大家都明白央行手執得嗰唔到2%息口，減幾次已企喺到，所以市場關注係減息後會搞邊科。上星期提及，美國隔夜逆回購連續出現求過於供，係略呈流動性緊張跡象，此處指國債之流動性。其後聯儲局推1.5萬億（美元，下同）回購，旨在為市場提供流動性。但回購只屬短期措施，唔算QE，其作用在市場有機會出現流動性緊張前先壓一壓，起碼保你冇咁易斬倉而引發雪崩。
由於市場預期聯儲局冇幾多招，遲早都要QE，搶買國債已非單純避險，直頭係囤積居奇，美國10年債息創歷史新低。就在債息創歷史新低之際，美債息好快又開始回升，有人開始沽債，搞乜？市場一窩蜂做同一件事，令債市出現流動性緊張。
賺大錢時候未到
美債有個特色，同年期的債券，新出嘅交投量較高，價較高而息較低，稱為on-the-run；舊一批交投量較低，價亦較低而息較高，稱為off-the-run。On-the-run債券會成為市場上指標，其與off-the-run債券價差往往也只有幾個BP。上星期美國10年債一度出現兩批債券價差50BP，掰價太大，就係流動性已有問題，持續便會有人侷住拆倉，例如買off-the-run債再沽off-the-run債套戥者，或以利率期貨做對沖者。
聯儲局急推7,000億QE，係防止債市因突然波動性太大出現債災，而非如08年要托已經劈落嚟的資產價格。或基於此，市場唔埋單，股市繼續跌。減息只係醫生叫你入房，回購係落鎮定劑，QE已經係打嗎啡。金融海嘯後3輪QE，QE1 1.725萬億，QE2 6,000億，QE3每月850億直至通脹及失業率達標。現時股市急插，資產價格未崩潰，但金融市場纖維化，功能開始出問題。聯儲局此刻為防金融危機，嗎啡劑量不能過猛，7,000億QE顯得到喉唔到肺。
市場似乎預期要更大鑊，央行先會落重藥，賺大錢時候未到。短期內反彈是相當有機會，已難斬倉。但嗎啡不是用來救肺炎，於是問題又回到疫情引發的被動式蕭條要搞幾耐。1929年大蕭條拖咗十幾年，其間剎那景氣讓人以為好轉，最後列國以戰爭告知平民真相，周期末段只有靠毀滅來開啟新階段。
Mr. Tregunter
本欄逢周二刊出
大棋局 - Mr. Tregunter 舊文
來源 source: http://hk.entertainment.appledaily.com
