【利字當頭】有使用限期的銀紙 - 利世民
銀紙有使用限期？稍為
知市場現實嘅讀者都知，通脹咪就係貨幣嘅「使用限期」。 資料圖片
「點解銀紙唔可以有expiry date？」上星期，同一位自命係左翼嘅嘉賓做網台節目；佢呢句說話，都引起觀眾唔少嘅留言討論。
講到「銀紙有使用限期」，我諗稍為知市場現實嘅讀者都知，通脹咪就係貨幣嘅「使用限期」；現實亦都話畀我哋知，貨幣嘅「使用限期」越短，窮人越難積累財富，資本嘅分配亦都會越不平衡。點解？因為大家太過狹義咁去理解財富。進階啲嘅講法，應該話要為「財富設下限期」；具體一啲咁講，其中一個方法，就係全球咁向資產同資產增值徵稅，亦即係Thomas Piketty嘅主張。
全球資產稅，可唔可以做到資產分配更加平均呢？任何構想，最終都要睇結果，但社會制度最難搞就係你一日唔做，都好難判斷成效。亦有人提出，自動化同機械人節省嘅成本，應該要徵稅，去彌補勞動階層損失嘅收入。不過，其實由古至今，唔少政治階層都嘗試用唔同嘅途徑，一方面均分資產同收入，處理社會矛盾，但另一方面就係透過從擁有資產嘅人手上獲取資源，維繫統治力量。歷史證明，無論點樣分配資產，最終又係會出現兼併，過得一百幾十年，又出現少數人擁有大多數資產嘅現象。反而透過操控少數擁有資產嘅大戶，係一個更有效率嘅管治。
政治經濟相互糾纏嘅關係，慢慢演變就出現穩定嘅結構。由封建農業社會到工業經濟，係第一次嘅大洗牌。由工業經濟到後工業社會，會唔會另一次轉變呢？我唔知。但歷史嘅教訓係，無論經濟結構點變，始終都會有權力同利益漸趨集中嘅現象；可能根本冇可能改變呢個千百年來嘅現象，又或者唔係簡單咁去阻止聚斂財富。
利世民
http://fb.com/leesimon.hk
本欄逢周二、四刊出
利字當頭 - 利世民 舊文
來源 source: http://s.nextmedia.com
