寫下4個牛頭角順嫂就滙控（005）取消派息的評論，再加一個假的評論，看看讀者是否猜得出來：
1）你簡直欺騙小股民，我都已經一把年紀，我等息救命的。
2）人哋投資咗喺你身上，你唔畀錢人、你唔派息，點會啱呢？
3）一間值得信任的公司，竟然與騙子沒有分別，你覺得過不過份？
4）你根本上逼到小股東，可不可以叫做逼我們去跳樓？可不可以說逼我們這些退了休人士，拿老本陪你們玩？
5）我揸盈富基金（2800），基金裏面梗係有滙控，你突然間唔派息，然後股價跌咁多，我作為投資者梗係有意見，但我唔係講狹窄嘅投資角度。
根據股息無關論，股息政策與公司價值無關的原因是股價高低會隨派息多少調整。失息導致股價跌？金融學傳統論述剛好相反，多派一元息，股價便下跌一元。最近一篇名為《The Dividend Disconnect》的學術文章，便指出不論大小投資者，都傾向犯上一種「免費股息謬誤」（free dividends fallacy），把股息收益和資本利得分開思考，以為派息是一種額外收益。
Babe這樣猜：「嘻，根本個個都係牛頭角順嫂。」我那樣話：「數據顯示，息口一低，投資者對高息股嘅需求就會增加，而呢啲投資者，係極少將收到嘅股息再投資返落去派息嗰隻股票度。」女友再猜：「咁牛頭角順嫂咪錯唔曬？」我再那樣話：「傳統金融學，唔易解釋到牛頭角順嫂嘅投資行為。牛頭角順嫂評論牛頭角順嫂，有時係準過諾貝爾獎得主去評論牛頭角順嫂。」
徐家健
美國克林信大學經濟系副教授
http://fb.com/economics3.0/
本欄逢周三刊出
MyGut者言 - 徐家健 舊文
來源 source: http://hk.entertainment.appledaily.com
