陸羽仁周記——父親節終於威番次
港股經過6月初大升後回調，上周轉趨穩定，恒指收報24643點，全周反彈342點；國指曾重返一萬關口，收報9974點。美股上周最後一個交易日就偏軟，主要係受新冠肺炎疫情反覆影響。杜瓊斯工業平均指數收報25871點，跌208點；標準普爾五百指數收報3098
點，跌17點；納指收升3點，報9946點。
美疫情反覆蘋果重新關店
美股尾市表現審慎，主要係外國染疫人數仍然高企，蘋果公司因應疫情會重新關閉十一間店舖，令市場對經濟復甦步伐信心受到影響。
上星期人大常委會開會，周六公佈草案大綱，估計細節仍可能有點變動。中美高層會面後，外電引述消息指，中國將加快採購美國農產品，以執行第一階段貿易協議，涉及產品包括大豆、玉米和乙醇。市場人士認為，各國疫後把焦點放在重啟經濟活動，以及中美貿易關係緩和，香港推動成立《國安法》，估計美國可能等月底詳情公佈時才作回應，部份市場焦點或會放回抗疫措施和政府每個市民派10,000元，昨日起開始申請。
上周末表現較好板塊係本地消費股，早前如果低吸這個板塊的股份，現在已有相當不俗的利潤在手，好似經營商場的九龍倉置業，上周五急彈6.4%，收報39.1元，為近月高位，另一隻利福（1212）更彈7.3%，報收6.95元。
健康碼拖住傳因太貴
上周本地消費股造好，有提早炒父親節消費暢旺的味道，由上周五晚起，銅鑼灣、尖沙咀重見大塞車，食肆全部爆滿，跟住幾日都係一位難求。過往父親節不算是最旺的大節，至少比起母親節就要差一截。然而，今年因為新冠肺炎疫情，政府實施限購令，一向喜歡消費的港人不但無得旅行遊埠，連出街食飯行街都唔得，大家悶足幾個月，直至上周五政府對食肆的限制大致放鬆，室內限聚令基本解除，於是借住父親節慶祝出師有名，所以搞到商場食肆大收旺場，父親節終於受到重視威番次。
自5月份開始，本地疫情基本受控，除了祿泉樓忽然爆發外，本地感染基本控制住，政府下一步就是想辦法刺激消費，政府喺父親節開始派10000元登記，預計下個月就有錢出街，財政司司長陳茂波上星期高調聯同飲食界議員張宇人，出來宣佈食肆大優惠，好明顯就係一次造勢行動。
七月份本地消費炒派錢，跟住應該炒中港關口復通，不過要復關香港應該要先做好健康碼，方便做好檢測追踨，健康碼安排應該早有宣佈，但到現在都未見消息。有說係因為現時私家醫院提出的收費太貴，擔心公佈出來市民不接受，議員會鬧爆。內地做健康碼檢測收費只是一百幾十，香港私院的健康碼收費要千幾元起跳，相差差不多10倍。香港收費勁貴，據說係因為加了要見醫生的要求。檢測其實只係需要用試劑，在實驗室進行，醫生根本沒有特別角色，點解要見醫生實在說不通，可能因此要拖住，所以原先公佈的措施無出街，消費股要等到父親節前先成功跑出。
利福股價相對落後
消費股上周偷步彈升，過去幾日街上人多車多，不排除開市仲有一陣亢奮，但跟住可能有獲利回吐都不出奇。大型商場股中，九置係最具代表性，雖然計單日利福升幅較勁，但放長點看，利福低位是5.8元，回升幅度只是兩成，九置低位是27.2元，回彈接近四成。
九置反彈力強，部份原因相信因為公司擁有優質商場物業，資產上較吸引，相反，利福主要經營地點位於示威核心區，但如果未來示威情況下降，利福就有炒落後的條件。
保就業出台 有線6000萬落袋
政府為了救市動用了超過3000億元，這些資金近日才陸續到位。除了下個月派10000元外，保就業計劃的錢都陸續派出，有線電視（1097）主席、人稱「老虎仔」的邱達昌就話有申請，以公司有近1400名員工計，差不多有近6000萬元資助，所以股價應聲彈起20%，收報0.064元。
有線攞得政府保就業的6000萬，未來應該會停一停手，不會大量裁員。在此之前，老虎仔已經狠劈數百人，把員工數目由1900人大幅減下來，雖然早前宣佈要放無薪假，但至少不會大手裁員，手下應該暫時鬆口氣。
雖然不會派大信封，但錢就要繼續慳，老虎仔話有線有線電視的節目組合一直在改變，不會再競投英超、歐聯等大型賽事，而改為地道小品。喺減人減製作成本後，過往七年淨現金流走後，終錄得連續三個月「止血」，業務「終於有少少微光」。
雖然講到好似扭轉了形勢，但老虎仔被人問起會否抽水，都只係話目前未有計劃再度集資，但係有需要都會供，言下之意，即是革命尚未成功，看來若然不想再泵水，未來就要慳住仲要再慳。
陸羽仁
陸羽仁周記 - 陸羽仁 舊文
來源 source: http://hd.stheadline.com
