【智取大市】科技股勢掀龍尾熱潮 - 晉佳
美國經濟向住悲觀劇本發展，勢必再有救市措施，科技股泡沫難以阻止，調整相信有限。 資料圖片
美股受到武肺疫情升溫拖累，由升轉跌，令港股黑期下跌超過300點，加埋港版國安法草案內容比預期仲要辣，相信今日港股跌幅只會更大。條例一日未出，外資面對政治風
險嘅疑慮猶在，而弱勢本地概念股恐再被沽。
上星期五美股先升後跌，主要因為疫情第二波。蘋果公司宣佈再度關閉部份店舖，睇怕重啟經濟分分鐘要等到疫苗出年初大規模應用，先至可以解決，究竟美國經濟有冇能力去承受？目前形勢係，美國經濟向住悲觀劇本發展，勢必再有救市措施，同時資金仍然氾濫。
即使3月面對疫情兼流動性危機，都打唔低科技股，相信喺聯儲局以阻止流動性危機為首要任務嘅今日，科技股泡沫難以阻止，調整相信有限，真正令科技股見頂嘅因素，係超買。疫苗股MRNA逆市升醞釀突破，其次係疫情贏家科技股會較快見底回升，當中包括本來已破頂、但周五跟隨大市回落嘅TWLO、ZS之類。
科技股其中一個走勢現象，就係一經歷調整後，重展升浪會加速。另一方面，炒風由龍頭炒到二、三線，百億美金以上嘅科技股、中概股都炒起曬，跟住可能向更細市值股份進發，情況就似2015年港股大時代4月底大價股見頂、5月喪炒細價股嘅趨勢，值得做定準備。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://s.nextmedia.com
