惠州買得過？
一直以來不少人詢問我點睇惠州的樓市，事關很多當地樓盤在港銷售，尤其黐住深圳的大亞灣更是推銷熱點，至於賣點呢？一個字——「平」，相比隔籬深圳龍崗區、坪山區，新樓呎價至少平3倍，現時大亞灣大概1,300人民幣/呎，坪山區約3,900人民幣/呎，龍崗區約4
,600人民幣/呎，好多人「睇餸食飯」，揸住百幾萬喺手，索性孤注一擲買個升值機會，加上經紀又狂sell「深惠一體」概念，聲稱未來深圳地鐵線14號將延伸至惠州，當開始興建就不是這個價錢雲雲……
齋講無謂，睇返數據最實際，兩年前我睇過某大亞灣新樓盤，當時叫價1,300人民幣/呎、帶裝修，上年12月開始交樓，現時該盤二手呎價1,000人民幣/呎左右，附近一手樓盤亦係咁上下價錢，不升反跌30%。至於深圳坪山區，這兩年平均升了22%，龍崗區則升了25%，所以一線城市就是一線城市，邊皮都有其價值。大亞灣的常住人口只有21.2萬，現售新盤有343個，未計建成那些，實際情況是供過於求，所以你上Google睇惠州房產新聞，不時出現「鬼城」二字。至於說好的地鐵呢，去年12月10日，惠州發展改革局宣布常住人口未達標，不具備地鐵條件，即是興建遙遙無期。順帶一提，韓國三星電子於2018年10月關閉位於惠州仲愷區的最後一座工廠，原址至今人去樓空，附近的餐廳和商店執得七七八八，地產中介表示當地有100棟6至7層的住宅大廈，先前都租給三星員工，關廠後，房價立刻暴跌，而且無人承接，受中美貿易戰影響，相信未來不少高新區都會出現類似蝴蝶效應。呢類文章很難寫，因為太阻人發達。
作者為《HEA富學》作者，Finsight ED founder
www.finsight-ed.com
https://www.facebook.com/heaology.edu
HEA富專欄 - 郭釗 舊文
來源 source: http://www.am730.com.hk
