【MyGut者言】港元不敗之謎 - 徐家健
自5.21人大宣佈審議港版國安法，港滙急貶了40點子，兩個多星期後，港元需求卻太強了，迫使金管局一日之內三度向市場注資！資料圖片
自5.21人大宣佈審議港版國安法，不少KOL就港元的存廢大放厥詞：聯繫滙率將受衝擊、聯滙變成終極核彈雲雲
，盡情發揮財演的自我修養。
是的，5.21之後一日，港滙急貶了40點子，為港元危機這齣戲展開序幕。兩個多星期前，財演那七情上面的一幕叫「資金率先表態」；兩個多星期後，掟港元的竟變了金管局，皆因港滙再次觸發7.75強方兌換保證。港元的需求太強了，迫使金管局一日之內三度向市場注資！
當個個KOL都潘紹聰上身，「恐怖在線」變「金融在跣」。坊間流行的金融鬼古有兩個：其一，阿爺頂，但唔頂得幾耐；其二，美帝投行借箭，是接港元準備之後作衝擊聯滙之用。我們要問，阿爺頂，為甚麼要在高位頂？美帝借箭，又為甚麼要在高位借？這跟日光日白搵鬼嚇人分別不大。
我跟Babe保證對她的愛穩陣過聯繫滙率。她要求戀愛fact check：「搵鬼信你呀，以前明明話拍拖同結婚係兩種嘢。」我解釋：「Blank cheque都有兩種，一種『開』嘅，一種『搵』嘅。」女友怕金局管的是blank cheque而不是fact check，我再解釋：「潘紹聰上身嗰啲先係black cheque。阿爺頂，慣咗跌到咁上下先去挾爆你。美帝投行做生意，更加冇理由不惜工本。港元咁強，第一樣要check嘅唔係阿爺定美帝先係鬼，而係嚟緊中概股喺港交所上究竟需要幾多港元。呢啲有數得計，就好似我咁唔係blank cheque。」
徐家健
美國克林信大學經濟系副教授
http://fb.com/economics3.0/
本欄逢周三刊出
MyGut者言 - 徐家健 舊文
來源 source: http://s.nextmedia.com
