【操盤手劄記】靠內需牌打硬仗 - 割柑人
中國打內需牌，乳業龍頭蒙牛奶品收入持續增長，上周又增持聖牧成大股東，不妨留意。 資料圖片
上世紀70年代，香港經濟起飛，由發展中地區蛻變為先進經濟體。幾十年嚟，香港講求放眼世界、國際視野；時移世易，如今香港係放眼內地。財爺陳茂波周日喺網誌話，
要穩住經濟，就要打通內循環、外循環，前者係指本地，後者係指內地！
內外循環概念，當然唔係陳茂波嘅諗頭，佢只係緊隨中央嘅思維。上周四，中央政治局開會，部署下半年經濟工作，被視為經濟政策嘅「定調會」。會議提到，「加快形成以國內大循環為主體、國內國際雙循環相互促進的新發展格局」。呢句話，其實上周二國家主席習近平喺企業家座談會提過；6月18日副總理劉鶴亦喺陸家嘴論壇提過；5月23日政協會議亦提過；5月14日政治局常委會議都有類似講法，係最早嘅官方表述。個個月講，可見已成新國策，可能寫入十四五規劃。
呢個新國策，「國內循環」擺喺「國際循環」之前，反映內部需求已被視為經濟主要動力。咁潛力有幾大？以佔GDP比重計，上年外貿降至33%，內部消費則達39%，爬外貿頭。相對日本、美國，內部消費佔比達55%、70%，中國增長空間頗大。
喺後疫情時代，面對中美交惡，經濟主打內需，係打硬仗。中美冷戰，股市難免陰霾籠罩。周一，港股兼逢滙控（005）績差，恒指跌0.6%，收24458，險守100天線，若失守，料將下試早前成交密集區底部23800水平。
中國打內需牌，估計將會調整結構，提升產業鏈水平；並會減稅降費，刺激消費。中資股宜吼內需股，中金日前就出報告，睇好乳品股、啤酒股等。乳業龍頭蒙牛（2319）奶品收入持續增長，上周又增持聖牧（1432）成大股東，不妨留意。
割柑人
操盤手札記 - 割柑人 舊文
來源 source: http://s.nextmedia.com
