陸羽仁周記 - 陸羽仁 2020年12月7日
陸羽仁周記——超前炒的股市派對
美國國防部上周末正式將中海油（883）母企及中芯國際（981）等四間華企，列入為與解放軍有聯繫的黑名單。憂慮中美關係轉差，成為大市近日主要陰霾，否則美股杜指升破三萬點，港股無理由無法突破二萬七關口。恒指上周五收報26835點，全周微跌58點，中斷連漲四周走勢。
美股猛飆 股民焗博
美股上周五氣勢如虹，三大指數齊創新高，但講出來有點諷刺，就係美國疫情死得人多，市場憧憬美國國會將會通過新一份支援經濟方案，於是資金又在市場炒作一番，三項主要指數創紀錄新高。杜指升248點，收報30218點；標普500指數升32點，收報3699點；納指升87點，收報12464點。
美股開市初段高開，美國非農業新增職位在11月只增加24.5萬個，遠低於市場預期的44萬個，主要是疫情肆虐拖慢招聘速度。11月失業率則由10月的6.9%，降至6.7%，符合市場預期。指數在收市前升幅擴大，主要係話兩黨國會議長通電話，指救助方案有進展，各項指數大幅飆升。
美國最近染疫人數接連多日創出新高，情況嚴峻，多個地區要停擺加強控制，但市場就先炒再印鈔，再炒有疫苗應市。熱錢超前炒，疫情未定股市升定先，不排除到明年第一季疫情穩定，大戶又會話信貸可能收緊趁好消息散水，所以投資面對眼前亂局，股市猛升只能選擇博定唔博。
股市向來係炒預期，在科網年代，這股風氣更誇張，不少科企市值遠超傳統行業老大哥。不過從螞蟻事件可以睇到，所謂新興科技往往只係因為法規和監管環境差異造成競爭優勢，一旦放在同一把尺下，估值可以大變。炒預期另一例子係最近投資市場炒疫苗面世，結果不同資產價格跟住走，美股喺實體經濟凋零下創新高，杜指衝破三萬點心理關口。
現實上，美國染疫同死亡人數正創緊新高，牀位緊張已經去到臨界點，但市場就當正一切好起來。有中環茶友笑言，現在市場資金太多，大家係焗炒，焗炒即係膽博膽，投資不能夠等數據分析，而係靠預測。以前做分析係用真憑實據，現在就概念先行，所以會出現醫院塞爆，疫症死人創新高，但大市已創新高，你愈觀望佢愈升，升到你唔信先入市就可能會接火棒。
滙控未復派息已先彈
這些看似不理性的現象，背後有其理性解釋，最大理由係平錢多，押錯注容易守，機會成本低，取態就係進取者贏。按照這個邏輯，到疫情真係受控時，大市可能已經炒上天咁高，屆時入市面對嘅唔係衰退風險，而係接火棒危機。
超前炒例子之一，就係因為停派息股價插到28元世紀供股價的滙控（005）。過去兩個星期滙控股價大幅上升，揭盅原來係炒英倫銀行批准集團重新派息。據外媒報道，英倫銀行最快下周批准滙控（005）及渣打（2888）恢復派息，滙控股價見過44元創逾八個月高位，收市上揚0.81%，報43.75元。喺低位增持大笨象的平保（2318）股價同期亦勇，收報97.85元，與歷史高位101元相差只係3%。
美國利息跌到超低水平，對銀行業經營不利，加上英美經濟嚴重受創，銀行股營運未見好大改善，但滙控股價炒恢復派息就炒到飛起。現時滙控反彈力度，比起其他銀行股彈得更多，實際上滙控就算回復派息，初期都不可能到達過去水平，但炒復派息的刺激，就搞到股價比正常股價更好炒，這個結果係正路分析無法估計。要留意的是稍後如果消息證實，股價又會不會見光死呢？
商場類股票係另一個超前炒的板塊。在此之前曾提過商場類股資產吸引，特別係內地商場受惠疫情受控，可以留意九龍倉（004）。其後九龍倉股價反覆上升，收報19.6元，與低位12元比升幅達58%。九龍倉在疫情期間正好遇上母公司會德豐私有化。私有化安排被指令基金大戶不滿，九龍倉股價因此深跌，但亦同時應驗跌得深、彈得勁的傳統智慧。
由優至次一級級向下炒
疫苗成效是否好似現時預期咁有效？生產和供應市場時間又如何？一連串問題仍有待解答。不過喺市場資金充斥下，投資者先炒上後找答案。這個過程有可能仍在發展中，如果沒有重大消息令預期逆轉，提前炒還會繼續下去，屆時資金會由最優質股票炒到次質股票，會由大股轉向三、四線以至細股，一級級向下炒。上周末市況已見有些股仔起動，這種炒作有點過份進取和非理性，但卻有可能是今年年結前的股市聖誕派對特色。
大裁員前中招 邱達昌可靜養度橋
有線電視主席邱達昌近日禍不單行，自己中咗新冠肺炎，集團裁員重整又惹起軒然大波。
有線電視本來裁減100名員工，當中新聞部大約是40人，結果瘦身消息一出，有員工自行請辭以示不滿。亂局中公司最初未見有人解畫，搞到只有不滿的員工出來猛鬧，有人發動訂戶杯葛停訂。
於滿城風雨下，聽聞邱達昌雖然中招，仍然四出問計。現時有線大約仍有20至30萬訂戶，但管理層覺得長遠而言，在免費資訊氾濫下，期望再有大量消費者付費購買資訊，似乎並不現實，所以集團點都要減磅。後來聲明話不裁員減薪，有效範圍都只係新聞部，其他部門都仲係震騰騰。
有線收費台缺乏持續經營的本錢，免費電視中連大台現時都做得咁辛苦，有線做免費電視幾時先見到曙光呢？這個咁難答的問題，隔離靜養的邱達昌可以趁呢個機會慢慢諗。
陸羽仁
陸羽仁周記 - 陸羽仁 舊文
來源 source: http://hd.stheadline.com
