下一個機會
上期講起現時投資賺錢易過做生意，但跟泡沫玩遊戲並不容易，話口未完即遇上美股港股大幅波動，何解？因為聰明錢早已悄悄由泡沫資產，流向穩定資產。標準普爾全美國房地產指數，於2020年9月錄得2014年以來最大升幅，達6.6%，西部城市鳳凰城西雅圖等升近10％，紐約最差都升4.3%
。睇落好似不是升很多，記住這是樓市，並不是Bitcoin或者科技股。
2020年香港樓市只微升0.1%，預計2021年最樂觀升7％，即是美國樓市一個月升多過你一年。美國樓市升有幾個因素配合，第一它是無限QE的核心區，銀行低息環境達到歷史新低的2.28%，加埋政府補助真係買抵過租，10月份按揭申請宗數已達到2008年金融海嘯次按危機水平。第二，因疫情關係發展商減慢樓宇供應， 美國房屋月供應量目前處於40年以來最低水平，二手樓非常搶手，有朋友放樓，即刻有幾台客睇，24小時內反價後成交，情況似足香港97年。第三是疫苗效應，疫情期間乜都做唔到，當然宅在家買股票(輕資產)，玩到起曬泡，疫情後回到有實質需求的樓房(重資產)，賺股轉到樓，是常識吧。而這並非單一事件，國內早於去年5月控制疫情後，6月至9月份深圳樓市升三成，中央出政策調控，10月轉炒廣州，三個月內又升三成。值得一提的是，兩國爆升城市的定位不同，詳情下期再述。
投資睇性格，我自問身手冇咁好，人又懶。短線難捉，長期趨勢易睇，只懂笨笨的在淡市時入場，讓時間累積財富。這篇文章的目的，是想大家知道疫後的資金流向，世界很大，香港樓市只是一個小井，我們不能坐井，眼光闊自然可找到下一個機會。
HEA富專欄 - 郭釗 舊文
來源 source: http://www.am730.com.hk
