操盤手劄記│ESG投資崛起 港股都有選擇（割柑人）
操盤手劄記│ESG投資崛起 港股都有選擇（割柑人）
ESG源於聯合國2005年嘅《Who Cares Wins》報告，當中提出企業應將環境、社會、管治納入營運標準以促進永續發展、實踐企業社會責任。
一通電話，港股由地獄折返人間，皆
因通話雙方係中美元首，係7個月嚟互不瞅睬後首次通話。上周四，港股受累科網股再有監管消息，急跌2.3%，翌日，中美元首通話，港股反彈1.9%。不過，睇返中美官方聲明，兩者頗多差異，例如新華社通稿提到嘅美方談及一中政策、白宮簡報提到嘅美方談及印太局勢，對方都冇提到；雙方一致嘅，只有「確保競爭不變衝突」。
下載Yahoo財經APP
美股、外匯、加密貨幣免費即時報價，自選投資組合獲取相關新聞提示。
中美相爭，始終有偈傾好過冇偈傾，對股市嚟講，「鬥而不破」已算正面訊號。美股早段亦受消息刺激上揚，但兩名參議員——財政委員會主席同銀行委員會主席，提議對企業回購股份課稅2%，美股隨即掉頭，三大指數全線收跌約0.8%。另外，據報美國考慮重啟中國補貼調查，中槪股又捱沽，受監管陰霾籠罩嘅教育股、科網股尤甚，港股ADR比例指數較港低水296點或1.2%。
女股神趕熱潮 籌建ESG ETF
講到中槪科網股，今年以嚟，可謂飽歷跌宕。年初，環球十大市值企業中，兩隻中槪股榜上有名，就係騰訊（港：700，美：TCEHY）同阿里巴巴（港：9988，美：BABA），分別名列第六同第九。不過，到6月，騰訊已跌至第十，阿里更跌出十大；到8月尾，騰訊被半導體廠商輝達（NVDA）爬頭，輝達上榜，騰訊出榜。環球十大市值榜，中槪股風光不再。
中槪科網股喺監管風暴下，投資者早有戒心。被本地網民封為「科技股女股神」、「契媽」嘅Cathie Wood，旗下ARK Invest喺6月尾開始清倉中概股，包括虎牙（HUYA）、百度（港：9888，美：BIDU）、阿里等。另一方面，佢喺近日著手籌備一隻Transparency ETF，所追蹤嘅指數不含酒類、銀行、賭博、油氣等行業，被喻為ARK嘅ESG（環境、社會、管治）ETF。
講求道德投資 毋須犠牲回報
ESG源於聯合國2005年嘅《Who Cares Wins》報告，當中提出企業應將環境、社會、管治納入營運標準以促進永續發展、實踐企業社會責任。根據港交所（388）報告，ESG關乎消除貧窮、廉價清潔能源、氣候行動等可持續發展目標。講求道德投資，會否犠牲回報？港交所報告提到，全球首隻ESG指數MSCI凱特400社會指數嘅年度回報率，過去9年中有7年跑贏MSCI美國可投資市場指數。
港交所喺上年12月成立可持續及綠色交易所「STAGE」，目前在港上市嘅ESG槪念ETF，包括海通MSCI中國A股ESG ETF（3031）、嘉實中證滬深300ESG領先指數ETF（3108）、Global X中國潔淨能源ETF（2809）、Global X中國電車ETF（2845）。前兩者係集中投資A股嘅ETF，後兩者除大部分投資A股外，仲有小部分投資港美股市，而且基金規模較前兩者大，流通量亦較前兩者高，不妨留意。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com
