笑到最後｜納指將會超越恒指（高明）
笑到最後｜納指將會超越恒指（高明）
圖為道指（深藍）、納指（淺藍）及恒指（橙）近年走勢。
曾幾何時，財經傳媒會將恒指及道指嘅點數作出比較，印象中，以往恒指仍然有一定競爭力，每次被道指超越，就係道指見頂嘅時間。事實上，過去係當恒指處於劣勢，道指先至有機會
同恒指相提並論。但係自從舊年疫情大反彈之後，美股反彈加速，相對恒指失速，到今年4月打後恒指更加墜機，討論道指同恒指比較已經過時，最新討論，應該係講納指幾時超越恒指。
下載Yahoo財經APP
美股、外匯、加密貨幣免費即時報價，自選投資組合獲取相關新聞提示。
純粹用點數計，舊年7月已經係港股同美股嘅分水靚，道指正式超越恒指，一改以往趨勢，其後嘅恒指要發力強勁，先能夠勉強追貼道指。如果用升幅計，
兩者當然都冇得同納指比較啦。
納指發力引擎仍多
至於點解實牙實齒咁話納指連點數都會超越恒指，主要係因為對上一個星期納指發力，大家要留意，兩大納指權重股蘋果（AAPL）及亞馬遜（AMZN）冇份參與，個別交易日更加成為負累。係咁嘅情況之下，納指仍然有能力破頂，足以話畀大家聽，納指發力嘅引擎眾多，唔好忘記，香港網上股民愛股Tesla（TSLA）今年仍然未重返高位，估值雖貴，用股價計其實係一隻落後股， 只要你睇Google（GOOGL）同Microsoft（MSFT）就知咩事。
同樣嘅事情發生睇恒指就會變得不可思議，試諗嚇三大動力ATM，如果股價維持低迷，恒指能夠維持橫行已經托賴，破頂更加係冇可能。
各種指數嘅計算方法定唔同，可能會有唔炒股票嘅學術派話咁樣嘅比較無意義，但係對於實戰立場來計，價格嘅升跌先係最重要，而country index就係比大家一個簡單嘅綜合，一眼望落去個市場有冇前景，用足球去比喻，個股就係球會，指數就係國家隊，集合球會唔同精英嘅總和，如果踢出嚟排名太低，除咗會令人質疑聯賽水平之外，更加實際影響可觀性，久而久之觀眾走曬，人氣越細資金越少，將會陷入另一個惡性循環。一個長期橫行嘅指數，變成反覆向下，甚至比其他基數更低嘅指數超越，寫學術論文可能唔重要，但係真金白銀擺落去嘅人就會心中有數。
公道啲講，全球各地指數都嚴重跑輸美股，簡單啲講即係除美股外搵食艱難，投資者當發現輸錢，多數係覺得方法輸、心態輸。如果有朝一日打開世界股價圖嚟睇，發覺美股一市獨大，原來係輸地點，久而久之將錢搬過去美股之後發現贏賭錢，其他地方嘅股市逐漸退化，美股一市獨大，透過資金自我證實美股強大，令到更貴嘅估值有實質嘅支持，全球性股市大單邊將會喺未來10年出現。
曾經大家都知就係港股係一個炒賣嘅市場，真正資金唔會喺度坐貨，無緣出現10年期大牛市，但炒上炒落有肉食，仍然有大批捧場客。今年4月後突然失速，要用更高嘅技術換取其他市場較易得到嘅回報。港股同全球股市趨勢相反而行，似乎只係開端。
所以本欄預言，未來五年內，納指點數將會超越恒指點數。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
