操盤手劄記│恒大爆雷 大劉甘比好傷？（割柑人）
操盤手劄記│恒大爆雷 大劉甘比好傷？（割柑人）
恒大面臨破產，股東陸續跳車。
美國聯儲局上周議息，除咗息率按兵不動，就連事先張揚今年開始縮減買債亦未行動；不過，雖然未taper，但放定風，準備11月會議後taper，明年中結束。儲局現
時每月買債1,200億美元，市場估計12月開始縮減，每月150億至200億美元，並於結束買債幾個月後開始加息，同儲局點陣圖顯示半數委員傾向明年底前加息脗合。美股近日回升，似係大跌後嘅技術反彈，多過對未taper嘅反應。
下載Yahoo財經APP
美股、外匯、加密貨幣免費即時報價，自選投資組合獲取相關新聞提示。
目前最搶fo嘅，唔係美國收水政策，而係中國監管政策。上周五，中國定調虛擬貨幣違法，Bitcoin應聲大跌近9%。除咗監管問題，中港市場仲受恒大（3333）債務問題困擾。港股收市後跌勢未止，夜期低水211點，港股ADR比例指數亦低水194點。中概股沽壓重，納斯達克金龍中國指數跌2.9%。阿里巴巴（9988）、騰訊（700）、美團（3690）喺美國分別再跌2.2%、1.4%、1.5%。
盟友牌友 陸續跳車
睇返恒大債務危機，據報集團總債務高達3,050億美元，一旦賴債，除咗波及上下遊產業，亦波及國內以至國際金融體系。市傳中央要求地方政府為恒大破產做好準備，另傳恒大重組或一拆三變成國企。恒大一筆美元債券上周四到期還息，但債權人上周五仍未收到債息，若30日寬限期死線過後仍未兌付就會違約。恒大本周三再有一筆美元債券到期還息，還唔還到呢？
恒大面臨破產，股東陸續跳車，繼「忠實盟友」中策（235）上周二公告，擬清倉所持恒大汽車（708）股權後，恒大主席許家印「鋤D會」牌友劉鑾雄相關嘅華人置業（127）亦於上周四公告，擬清倉所持恒大股權。華置指出，8月30日至9月21日已沽0.82%，每股平均價2.26元，套現2.46億元，仍持有5.66%，仍為第二大股東；而以9月21日收市價每股2.27元計，若今年沽清，估計本年度虧損94.86億元。
借債分紅 益自己友
值得注意嘅係，據披露易資料，大劉同太太甘比喺8月26日至9月10日減持恒大後，截至當日數據，仍持有7.96%，當中6.49%透過華置持有，1.47%由甘比實益持有。華置減持期間，可能混雜二人持倉。與此同時，大劉「禦用券商」天發證券嘅恒大持倉大增，估計只係射倉，而非大劉反手增持，因為股東持倉高於5%，按例股權變動須作披露，但唔見有相關披露。
華置、大劉夫婦掟恒大貨，輸幾多錢？據鳳凰網《風暴眼》報道，2009年至今，恒大累計賺到1,733.88億人民幣，但幾乎年年大比例分紅，總額近700億人民幣。由持股比例睇，分紅大部分落入許家印同「朋友們」嘅袋，呢部分近540億人民幣。僅2011年起，許就通過分紅套現499.81億人民幣。華置係恒大2009年上市時嘅基石投資者，清倉估計蝕近百億屬實，但未計及期間每股逾5元人民幣派息，而大劉入股更加係喺恒大上市前，若計及利息同實際成本價，應蝕少好多，挽下手有賺！
割柑人
曾任財經記者、編輯，在本港報章撰寫財經專欄作家逾十年
www.fb.com/hkstockpicker
本欄逢周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com
