騙術好多款 最怕無王管
騙術好多款 最怕無王管
有市場人士質疑證監會是無牙老虎。(資料圖片)
對於證監會(SFC)，市場人士總會存在許多質疑，覺得佢哋係無牙老虎，查一單市場不當行為都動輒花上十年八載，以為聯同ICAC甚至CCB執法配合龐大專業團隊十拿九穩，竟然都可以告唔入。尤其近年涉及
內幕交易、市場操縱等案件都係鮮有告得入，白白浪費了大量調查及訴訟時間，有如放虎歸山。究竟當中係有人睇漏眼抑或道行未夠，正所謂道高一尺魔高一丈，唯有套用老夫子常用的四字詞：耐人尋味。
有人會問，點解唔派臥底調查？問的人可能係睇得太多反貪字母風暴系列，甚至《竊聽風雲》等電影，以為查案好容易。香港一向沒有集體訴訟以保障投資者權益，老千賊匪橫行，股市治安極差。新冠肺炎疫情未肆虐前港股曾流行過一陣啤殼熱潮，收市後中、灣、銅酒吧竟然可以周不時聽到背後一堆二堆大口仔大口妹慌死個場無人知佢做IPO「人頭」咁，邊劈酒邊旁若無人高談闊論，話攞幾千認購某隻IPO坐一陣就賺一個開。聽得太多，只可以用四個字形容如此世風日下的香港股市：和尚打傘。手法萬變不離其宗又係先玩貨源歸邊再愈踢愈高，然後利用斟茶灌水手口並用引導集齊無知貪心兼錢多身痕素質的小散戶高位接貨，乘機散水再落閘放狗，小散戶統統輸到爆廠兼無仇報。
香港股票市場中好一部分且為數不少的參與者，早已被這個鱷魚潭收到口服心不服，市場老兵均選擇速戰速決免得夜長夢多，情願跑多幾轉炒波幅。傳統股如是，以妹仔大過主人婆姿態搶佔藍籌成分權重的新經濟互聯網平台－－科指，於今年首季跌幅近15%，走慢啲都損手爛腳。
追溯12年前金融海嘯肆虐時，連環爆的累計期權(Accumulator)及迷你債券風潮，前者正好就是累及城中不少富豪人仰股翻、P. I.專業投資者才有資格輸的衍生產品，有上市公司可以因而虧損過百億。如果輸嘅係上巿公司錢而你又係小股東，都唔好話富豪輸錢唔關你事。
至於迷你債券事件，擺明係利用監管政策，在產品設計上避重就輕而監管機構又未及時堵塞漏洞，偏偏遇上金融災難令風險盡情暴露所觸發，迷債設計師難辭其咎。賣公仔紙的只顧眼前利益，買產品者又被名稱與回報誤導，愛上了冒險卻未知自己其實承受風險能力有限。
近年的高息內房美元債，又係另類高風險投機遊戲，賺埋未必夠輸的例子。還好受影響的都是一眾專業投資者，早幾年賺到開巷，食過返尋味擋也擋不住，即使因部分違約輸了亦未必入肉，啞仔食黃連，輸咗都不敢高聲呼救嗌「打劫」。反而早幾年不買點高息內房債看門口怕茶餘飯後無話題，怕執輸更怕無面，如今蝕咗不敢聲張，同樣又係怕無面。
投資投機、高息債垃圾債、微信女是仔是女，搞不清楚，險象橫生，每次都係賊過才興兵，無王管的市場，唯有靠自求多福。
談財經 - 胡孟青 舊文
本文作轉載及備份之用 來源 source: http://www.am730.com.hk
