笑到最後｜細數美國佬都搞唔掂事件（高明）
笑到最後｜細數美國佬都搞唔掂事件（高明）
為咗保住自己份身家，美國自己會優先處理美股問題，令到股價再次偉大。
美股反覆下跌，納指更加跌穿2月及3月的低位，連帶高增長股全部變待富股，對美股嘅信心同股價同步插水。
美股、外匯、加密貨幣免費即時報價，
自選投資組合獲取相關新聞提示。
市場有一說，叫美國佬會搞掂，意指美國喺美國股市嘅既得利益比任何一個散戶都嚟得更多，為咗保住自己份身家，美國自己會優先處理美股問題，令到股價再次偉大。
以上嘅諗法，拉長美股過百年歷史，無疑係正確，如果睇歷任總統政績，後世留名嘅總統，在任時嘅股市都係升得勁，財富效應大家荷包漲，經濟好民望高嗰啲自動嚟。但係如果美股係一部荷李活片，例如職業特工隊之類，就知道美國佬大部份時間都係搞唔掂居多，然後好似拍戲咁最後靠主角光環搞掂，美股要贏，就係要捱過大部份「美國佬搞唔掂」嘅時刻。
要數美國佬搞唔掂嘅時刻，唔計太遠嘅史前年代，有互聯網後，喬治布殊年代真係搞唔掂，任內標普下跌40%，上任之初已經遇上科技股泡沫爆破，以及911恐怖襲擊。任內股市浮浮沉沉，連帶生涯末段，都整返次金融海嘯，近日睇新聞發現做一個地區領導要係「天選之人」，布殊好明顯唔係。
同期嘅聯儲局主席格林斯潘2004至2006年加息，就係期間美股唔升嘅主因，到後期次按風暴開始減息，最後美國樓爆亦都唔係淨係減息救得番。如果布殊上任買股，到佢落台，應該都幾折磨。任內少數對股市貢獻，係Google（GOOGL）、亞馬遜（AMZN）等都係喺科網爆破之後崛起，雖然唔關總統事，高明亦都相信，當年嘅布殊唔係太理呢啲嘢，變相唔理就可以自由發展。
拜登上任後 美股累升8%
另一個美國佬搞唔掂時刻，就係奧巴馬年代。大家可能會話，奧巴馬任內，標普升182%，睇圖幾乎長升長有，亦係史上最長牛市，冇可能搞唔掂。實際上，任內初期就係處於搞唔掂同刻意玩嘢邊緣，09年金融海嘯後反彈，奧巴馬低位上任自然有股價好表現，但到2010年亦曾浮浮沉沉冇起色，關鍵就係斷斷續續嘅量化寬鬆，每次都唸口簧話會加息、減買債及MBS，QE政策當時亦係臨時措施，政策並唔連貫，有QE就炒，冇就即死，直至QE3無限化，隨後嘅美股先至一帆風順。高明認為初段係刻意講加息控制通脹預期，亦都要製造民意，令無限QE合理化。
今屆政府拜登管治水平雖然受到質疑，但係以標普指數計算，上任至今美股仍然升緊8.39%，只係由舊年11月高峰滑落得太快，先有一㮔感覺係今屆政府不利股市。感覺上亦似行緊奧巴馬舊路，只係今屆處理得較差，印鈔連同能源供應失控，先至被逼狂加息。美股最終都會搞掂，因為美國多年國策亦係一直擴充聯儲局資產負債表，只係今屆政府似乎唔太搞得掂，連帶疫情後數碼化一招開始現疲態，下個趨勢又未出，先至有強烈嘅美國佬搞唔掂嘅現況。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
